དེ་ཅིའི་ཕྱིར་ཞེ་ན། གཞོན་ནུ་སྒྲུབ་པ་སྙིང་པོར་བྱེད་པ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྙེད་དཀའ་བ་མ་ཡིན་པའི་ཕྱིར་རོ་ཞེས་དང༌། སྒོམ་རིམ་དང་པོ་ལས་ཀྱང༌། དེ་ལྟར་སེམས་བསྐྱེད་པའི་བྱང་ཆུབ་སེམས་དཔའ་བདག་མ་དུལ་བར་གཞན་ མི་འདུལ་བར་ཤེས་ནས་བདག་ཉིད་སྦྱིན་པ་ལ་སོགས་པའི་སྒྲུབ་པ་ལ་རབ་ཏུ་སྦྱོར་རོ། །སྒྲུབ་པ་མེད་པར་བྱང་ཆུབ་མི་འཐོབ་བོ་ཞེས་གསུངས་སོ། །སྒྲུབ་པ་ཡང་སྡོམ་པ་བཟུང་ནས་དེའི་བསླབ་པ་ལ་སློབ་པ་ཉིད་ཡིན་ནོ། །
གཉིས་པ་ནི། སངས་རྒྱས་ སྒྲུབ་པའི་ཐབས་ལ་འཇུག་པ་དེ་ཡང་ཐབས་མ་ནོར་བ་ཞིག་དགོས་ཏེ། ནོར་བའི་ལམ་ལ་ཇི་ཙམ་འབད་ཀྱང་འདོད་པའི་འབྲས་བུ་མི་འབྱུང་བའི་ཕྱིར་རོ། །མ་ནོར་དུ་ཟིན་ཀྱང་ཆ་མ་ཚང་ན་འབྲས་བུ་མི་འབྱུང་བས་ཚང་ལ་མ་ནོར་བ་ལ་བསླབ་པར་བྱའོ། །དེ་གང་ ཞེ་ན། རྣམ་སྣང་མངོན་བྱང་ལས། གསང་བ་པའི་བདག་པོ་ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན། བྱང་ཆུབ་ཀྱི་སེམས་ཀྱི་རྒྱུ་ལས་བྱུང་བ་ཡིན། ཐབས་ཀྱིས་མཐར་ཕྱིན་པ་ཡིན་ནོ། །ཞེས་གསུངས་པ་ལྟར་སྙིང་རྗེ་ཆེན་ པོ་དང་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་དང་ཐབས་སྦྱིན་པ་ལ་སོགས་པའི་ཕར་ཕྱིན་ནོ། །
གསུམ་པ་ནི། སྨོན་སེམས་བཟུང་ནས་བསླབ་པ་ལ་སློབ་འདོད་སྦྱངས་ཏེ། དེའི་རྗེས་སུ་རྒྱལ་སྲས་ཀྱི་སྡོམ་པ་བཟུང་བར་བྱ་ལ། དེ་ནས་ བསླབ་པ་ལ་ཚུལ་བཞིན་དུ་བསླབ་པར་བྱའོ། །བསླབ་བྱའི་རིགས་བསྡུ་ན་མདོ་སྡེ་རྒྱན་ལས་བཤད་པ་ལྟར་ཕར་ཕྱིན་དྲུག་ཏུ་འདུས་ཏེ། མངོན་མཐོ་ལ་ལྟོས་པ་དང༌། དོན་གཉིས་སྒྲུབ་པ་ལ་ལྟོས་པ་དང༌། གཞན་དོན་རྣམ་པ་ཐམས་ཅད་པ་རྫོགས་པར་
