༄༅། །པར་བྱ་སྟེ་དེ་ཡང་ངའོ་སྙམ་པའི་ང་ནི་ཕུང་པོ་ལ་བཏགས་པ་ཙམ་དུ་བཞག་པར་ཟད་ཀྱིས་རང་བཞིན་གྱིས་གྲུབ་པ་དང་རང་གི་མཚན་ཉིད་ཀྱིས་གྲུབ་པ་དང༌། རང་དབང་བའི་སྡོད་ལུགས་སུ་གྲུབ་པ་ ཅུང་ཟད་ཀྱང་མེད་པས་གང་ཟག་གི་ཡོད་པ་ནི་མིང་གི་ཐ་སྙད་ཀྱིས་བཞག་པ་ཙམ་དང༌། བཏགས་ནས་ཡོད་པ་དང་ལྟོས་པའི་ཚུལ་གྱིས་ཡོད་པ་ཁོ་ནར་ཟད་པས་རང་བཞིན་མེད་དོ་སྙམ་དུ་ཡིད་ལ་བྱའོ། །དེ་བཞིན་དུ་ཕུང་པོ་ལ་ སོགས་པའི་ཆོས་ཐམས་ཅད་ལ་སྦྱར་ནས་བསྒོམ་པར་བྱའོ། །འདིར་སྨྲས་པ། ཇི་སྲིད་རྗེ་བཙུན་དམ་པ་མ་རྙེད་པ། །དེ་སྲིད་སྲིད་པའི་རྩ་བ་གཅོད་བྱེད་ལམ། །རྟེན་འབྱུང་མཐའ་དང་བྲལ་བའི་དབུ་མ་ནི། །ཕྱོགས་ ཙམ་ཞིག་ཀྱང་རྟོགས་པར་མ་གྱུར་ཏོ། །བདག་ལ་ལེགས་པར་བཤད་པ་ཇི་སྙེད་ཅིག །ཡོད་པ་དེ་ཀུན་བླ་མའི་དྲིན་ཡིན་པས། །དགེ་བ་དེ་ཡིས་བདག་གི་མ་རྣམས་ཀུན། །ཐེག་མཆོག་བཤེས་དང་ཕྲད་པའི་རྒྱུར་གྱུར་ཅིག ། མཐའ་བྲལ་དབུ་མའི་དེ་ཉིད་མ་རྟོགས་པར། །འཕགས་མཆོག་གོ་འཕང་རེག་པར་མི་ནུས་པས། །སྟོང་པ་རྟེན་འབྲེལ་དོན་དུ་མཐའ་དཔྱད་ནས། །ཚུལ་བཞིན་འབད་པས་སྒྲུབ་ལ་བརྩོན་པར་བྱ། །བསྐལ་པ་བྱེ་བ་ བརྒྱར་ཡང་རྙེད་དཀའ་བ། །ཀླུ་སྒྲུབ་ལུགས་བཟང་བདེན་གཉིས་སྨྲ་བ་དག །ཞིང་འདིར་རིང་པོར་མི་ཐོགས་ནུབ་འགྱུར་བས། །རྣམ་དཔྱོད་ལྡན་རྣམས་མྱུར་དུ་བརྩོན་འགྲུས་བསྐྱེད། །བསྡུ་བའི་ཚིགས་སུ་བཅད་པའོ། །
