པའི་གཏད་སོ་མཐའ་དག་མེད་པར་རྟོགས་པར་སྤྲོས་པ་མཐའ་དག་རབ་ཏུ་ཞི་བ་ཡིན་ཏེ། སྟོང་ཉིད་མངོན་སུམ་དུ་རྟོགས་པའི་གང་ཟག་གི་དོན་སྟོང་ཉིད་ལ་གཉིས་སྣང་གི་སྤྲོས་པ་ཡང་ཞི་ལ་སྟོང་ཉིད་དོན་སྤྱིའི་ཚུལ་གྱིས་རྟོགས་པ་ལ་ནི་ གཉིས་སྣང་མ་ཁེགས་ཀྱང་ངེས་དོན་བདེན་པའི་སྤྲོས་པ་ཁེགས་པ་ཡིན་ནོ། །ཚིགས་བཅད་འདི་དང་འོག་མ་ལྔས་འབྲས་བུའི་གནས་ཚུལ་རྒྱས་པར་སྟོན་པ་ཡིན་ནོ། །སྟོད་ལུང་རྒྱ་དམར་ན་རེ་གནས་ལུགས་མངོན་སུམ་དུ་གྱུར་པའི་ ཚེ་ཤེས་པ་མེད་པ་དང་ཤེས་བྱ་མེད་པར་བསྟན་བཅོས་འདི་དང་བདེན་གཉིས་མཁན་པོའི་བཞེད་པར་བྱས་ནས། ཁོ་བོས་ནི་ཤེས་བྱ་མེད་པའི་ཤེས་པ་དང་གཞལ་བྱ་མེད་པའི་ཚད་མ་མ་རིག་གོ་ཞེས་ཟེར་ཞིང་རང་ཉིད་བདེན་སྟོང་ བདེན་གྲུབ་ཏུ་འདོད་པ་ནི་ཤིང་རྟ་ཆེན་པོའི་བཞེད་པ་ཅུང་ཟད་མ་གོ་བར་གསལ་ཞིང༌། རང་ཉིད་ཀྱང་རྟག་ལྟའི་གཞན་དབང་དུ་གྱུར་བཞིན་དུ་དབུ་མའི་དོན་རྟོགས་པར་རློམ་པ་ནི་མི་རིགས་པ་ཆེན་པོ་ཡིན་ནོ། །གསུམ་པ་ལ་ གཉིས། རྣམ་རྟོག་མེད་ཀྱང་གདུལ་བྱའི་རེ་བ་སྐོང་བ་འཐད་པ་དཔེ་དང་བཅས་པ་དང༌། དེ་ལ་རྩོད་པ་སྤང་བའོ། །དང་པོ་ནི། སངས་རྒྱས་ལ་རྟོག་པ་ཐམས་ཅད་ཉེ་བར་ཞི་བ་ཡིན་ན་གདུལ་བྱ་ལ་ཆོས་བསྟན་པར་བྱའོ་སྙམ་པ་ ཡང་མེད་པས་སེམས་ཅན་ལ་ཆོས་བསྟན་པ་སོགས་ཀྱི་དོན་མཛད་པ་མི་འཐད་དོ་ཞེ་ན། སྐྱོན་མེད་དེ་རྟོག་པ་མེད་ཀྱང་མི་ལ་ཡིད་བཞིན་ནོར་བུ་དང་ལྷ་ལ་དཔག་བསམ་གྱི་ཤིང་ལ་གསོལ་བ་བཏབ་པས་ཇི་ལྟར་འདོད་པའི་རེ་བ་ཡོངས་
