སེམས་ཅན་དུ་མ་ཡིན་ཡང་གཅེས་པར་འཛིན་པ་གོམས་ན་རང་གི་ལུས་ལྟར་གཅེས་པར་འཛིན་པའི་འགྲོ་བའི་ཡན་ལག་ཏུ་ཅིའི་ཕྱིར་ལུས་ཅན་རྣམས་བསྲུང་བྱར་མི་འདོད་དེ་འདོད་པར་རིགས་སོ། །གཉིས་པ་ལ་ གསུམ། བདག་གཞན་བརྗེ་བའི་ཚུལ་བཤད་པ་དང༌། བརྗེས་ནས་བསམ་པས་རྗེས་སུ་སྒྲུབ་པའི་ཚུལ་དང༌། སྦྱོར་བས་རྗེས་སུ་སྒྲུབ་པའི་ཚུལ་ལོ། །དང་པོ་ལ་གཉིས། རྒྱས་པར་བཤད་པ་དང༌། དོན་བསྡུ་བའོ། ། དང་པོ་ལ་གསུམ། གཞན་གཅེས་འཛིན་གོམས་པར་བྱ་བ་དང༌། བདག་གཅེས་འཛིན་འབད་པས་སྤང་བར་བྱ་བ་དང༌། བདག་དང་གཞན་གཙོ་བོར་བྱེད་པའི་སྐྱོན་དང་ཡོན་ཏན་བསམ་པའོ། །དང་པོ་ལ་ལྔ། བདག་ གཞན་བརྗེ་ནུས་ཤིང་རློམ་པ་ཞི་བར་འགྱུར་བ་དང༌། རྣམ་སྨིན་ལ་མི་ལྟོས་པར་དེ་བསྒོམ་པ་ལ་འབད་པར་གདམས་པ་དང༌། དེས་ན་གཞན་དོན་ཆེད་ཆེར་བྱ་བ་དང༌། གོམས་ན་བསྐྱེད་ནུས་པ་དང༌། བདག་གཞན་ སྡུག་བསྔལ་ལས་སྒྲོལ་འདོད་པས་བདག་གཞན་བརྗེ་བ་བསྒོམ་པར་བྱ་བའོ། །དང་པོ་ནི། བདག་གཞན་བརྗེ་བའི་བློ་གོམས་པར་མི་ནུས་སོ་ཞེ་ན། ཇི་ལྟར་གང་ཟག་གི་བདག་མེད་པའི་ལུས་འདི་ལ་ གོམས་པས་བདག་གི་བར་འཛིན་པའི་བློ་འབྱུང་བ་དེ་བཞིན་དུ་སེམས་ཅན་གཞན་ལ་ཡང་གཅེས་འཛིན་གོམས་པས་བདག་གི་བའི་བློ་ཅིས་མི་སྐྱེ་གོམས་པས་ངེས་པར་སྐྱེའོ། །སེམས་ཅན་ཀུན་
