དང་བྲལ་བའི་ཉི་ཟེར་གྱིས་ཕྱེ་བའི་པདྨ་གཞོན་ནུ་ལ་དེ་དག་ཚང་ན་དེ་སྤངས་ནས་ནི་མི་གཙང་བ་ལ་ཞེན་པའི་སེམས་ཀྱིས་ནི་མི་གཙང་བའི་གཟེབ་ལ་ཅིའི་ཕྱིར་དགའ། དགའ་བར་མི་རིགས་པས་དབྱིབས་ལ་ཡང་ཆགས་པར་མི་རིགས་སོ། །
གཉིས་ པ་ལ་བཞི། མི་གཙང་བའི་འབྱུང་ཁུངས་ཡིན་པས་མི་གཙང་བར་བསམ་པ་དང༌། དེའི་འབྲས་བུ་ཡིན་པས་མི་གཙང་བར་བསམ་པ་དང༌། ལུས་མི་གཙང་བ་དཔེས་བསྟན་པ་དང༌། རང་གི་ལུས་མི་གཙང་བར་བསམ་པའོ། །
དང་པོ་ནི། གཞན་ ཡང་ས་ཕྱོགས་མི་གཙང་བ་ངན་སྐྱུགས་སོགས་དག་གིས་གོས་པ་ལ་གལ་ཏེ་རེག་པར་མི་འདོད་ན་ལུས་གང་ལས་མི་གཙང་བ་དེ་ནི་བྱུང་བ་ཡི་ལུས་ལ་ཇི་ལྟར་ཁྱོད་རེག་པར་འདོད་འདོད་པར་མི་རིགས་སོ། །
གཉིས་པ་ནི། གལ་ཏེ་མི་གཙང་བ་ལ་ ཆགས་པ་མེད་ན་མི་གཙང་བའི་ཞིང་མའི་མངལ་ལས་བྱུང་བར་གྱུར་ཅིང༌། མངལ་དེའི་ས་བོན་ཕ་མའི་ཁུ་ཁྲག་དེས་བསྐྱེད་པའི་ལུས་གཞན་ཁྱོད་ལ་ཅིའི་ཕྱིར་པང་དུ་འཁྱུད་ཅིང་ཆགས་པར་བྱེད་མི་རིགས་སོ། །
གསུམ་པ་ནི། གཞན་ཡང་ཁྱོད་ མི་གཙང་བ་ལས་བྱུང་བའི་མི་གཙང་བའི་སྲིན་བུ་ཆུང་ངུའང་ཁྱོད་འདོད་པར་མི་བྱེད་ལ། མི་གཙང་བ་མང་པོའི་རང་བཞིན་གྱི་ལུས་མི་གཙང་བའི་རྫས་སུམ་ཅུ་རྩ་དྲུག་གི་རང་བཞིན་ལས་སྐྱེས་པའང་ཇི་ལྟར་འདོད་པར་བྱེད། ཁྱོད་ནི་ རང་གི་མི་གཙང་བ་ལ་སྨོད་པར་མི་བྱེད་པར་མ་ཟད་ཀྱི་མི་གཙང་བའི་རྐྱལ་པ་མི་གཙང་བ་ལ་བརྐམ་པས་མི་གཙང་བའི་ཕུང་པོ་གཞན་ཡང་འདོད་པར་བྱེད་པ་འདི་ནི་མི་རིགས་སོ། །
བཞི་པ་ལ་གཉིས། ལུས་མི་གཙང་
