གང་ལ་གོས་གཡོགས་ཀྱང་འདི་ལ་ཆགས་པ་ཁྱོད་དུར་ཁྲོད་དུ་བོར་བའི་ཚེ་དེ་མ་གཡོགས་ན་ཅིས་མི་འདོད་དེ་ལ་ཡང་འདོད་པར་བྱ་དགོས་སོ། །དུར་ཁྲོད་དུ་བོར་བ་དེ་ལ་དགོས་པ་མེད་ན་ནི་གོས་གཡོགས་པ་ལ་ཁྱོད་ཅིའི་ཕྱིར་འཁྱུད་མི་གཙང་བར་མཚུངས་ པའི་ཕྱིར་རོ། །གཉིས་པ་ལ་གསུམ། མི་གཙང་བར་མངོན་སུམ་དུ་གྱུར་པས་ཆགས་པར་མི་རིགས་པ་དང༌། རྟགས་ལས་ངེས་པས་ཆགས་པར་མི་རིགས་པ་དང༌། དེས་ན་གཙང་བར་ཞེན་པ་དགག་པའོ། །དང་པོ་ལ་ལྔ། རེག་བྱ་ལ་ ཆགས་པར་མི་རིགས་པ་དང༌། གཙང་བར་རྟོག་པ་དགག་པ་དང༌། ལུས་སེམས་སོ་སོར་ཆགས་པའི་གནས་མ་ཡིན་པ་དང༌། ཉེས་པ་དེ་དག་རང་ལ་སྦྱར་ནས་བསམ་པ་དང༌། དབྱིབས་ཆགས་པའི་གནས་མ་ཡིན་པའོ། །དང་པོ་ནི། བུད་ མེད་ཀྱི་ཁ་ཆུ་ལ་དགའོ་ཞེ་ན་གཉིས་ཀའི་རྒྱུ་ཟས་ནི་གཅིག་པུ་ཉིད་ལས་ནི་འབྲས་བུ་བཤང་གཅི་དང་ཁ་ཆུ་གཉིས་འབྱུང་བར་འགྱུར་ན་དེ་ལས་བཤང་བ་ལ་མི་དགའ་ཞིང༌། ཁ་ཆུ་ལ་ཁྱོད་ཅིའི་ཕྱིར་དགའ་རྒྱུ་མི་གཙང་བ་ལས་བྱུང་བ་དང་འབྲས་བུ་མི་ གཙང་བར་མཚུངས་པའི་ཕྱིར་རོ། །ཤིང་བལ་རེག་ན་འཇམ་པ་ཡི་སྔས་ལ་ཡང་བུད་མེད་ཀྱི་རེག་བྱ་ལྟར་དགའ་བར་མི་བྱེད་པ་བུད་མེད་ཀྱི་ལུས་ལ་འཛག་བཞིན་དུ་དྲི་ང་བ་འཛག་པ་མ་ཡིན་ནོ་ཞེས་འདོད་ལྡན་མི་གཙང་བ་ལ་གཙང་བར་རྨོངས་ནས་ ཆགས་པར་བྱེད་དོ། །འདོད་ལྡན་གྱི་སྐྱེ་བོ་ངན་པ་རྨོངས་པ་རྣམས་ཤིང་བལ་ལ་རེག་ན་འཇམ་པ་ལ་འདི་ལ་ཉལ་པོ་བྱ་བར་མི་ནུས་སོ་ཞེས་ཤིང་བལ་དེ་ལ་ཁྲོ་བ་དག་ཏུ་བྱེད་པས་ཕྱིན་ཅི་ལོག་ཏུ་ཞེན་པ་འབའ་ཞིག་ཡིན་པས་རེག་བྱ་ལ་ཆགས་པར་མི་རིགས་
