ཡོད་ཅེ་ན། སྔ་མ་དེའི་བྱེད་པ་རྒྱུ་མཐུན་གྱིས་སྐྱེ་བ་གཞན་དུའང་འདོར་བ་དེ་གོམས་ཤིང་དམ་བཅའ་ཉམས་པའི་སྐྱེས་བུ་བྱེད་འབྲས་སྡིག་པ་དང༌། དེའི་རྣམ་སྨིན་སྡུག་བསྔལ་འཕེལ་བར་འགྱུར་ཞིང་ཕྱིས་བརྩམས་པའི་བྱ་བ་གཞན་དང་ལས་དེ་ ཉིད་ཀྱིས་འབྲས་བུའི་དུས་ཀྱང་ནི་དམན་པར་འགྱུར་བ་དུས་རིང་པོར་འགོར་བ་དང༌། ལས་གཞན་དེ་ཡང་འགྲུབ་པར་མ་འགྱུར་བས་སོ། །གཉིས་པ་ལ་གཉིས། བསྡུས་ཏེ་བསྟན་པ་དང༌། སོ་སོར་བཤད་པའོ། །དང་པོ་ནི། བྱ་བ་དེ་ལ་ཞུགས་ ནས་བྱ་བའི་ལས་དང་སྤང་བྱའི་ཉོན་མོངས་དང༌། འཇུག་ལྡོག་བྱེད་པའི་ནུས་པ་སྟེ་གསུམ་པོ་དག་ལ་མ་ཞུམ་ཞིང་སྟོབས་བསྐྱེད་པའི་ང་རྒྱལ་བྱའོ། །གཉིས་པ་ལ་གསུམ། ལས་ཀྱི་ང་རྒྱལ་དང༌། ནུས་པ་ལ་ང་རྒྱལ་བྱ་བ་དང༌། ཉོན་མོངས་པ་ལ་ང་རྒྱལ་ བྱ་བའོ། །དང་པོ་ལ་གསུམ། ལས་ཀྱི་ང་རྒྱལ་ངོས་བཟུང་བ་དང༌། དེ་ལྟར་བྱེད་པའི་རྒྱུ་མཚན་དང༌། གཞན་གྱི་དམན་པའི་ལས་ལ་ཡང་ཁུར་འཛིན་པའི་ང་རྒྱལ་བྱ་བའོ། །དང་པོ་ནི། གཞན་གྱིས་བྱ་བར་འོས་པའི་ལས་མཐོང་ན་བདག་ཉིད་གཅིག་ པུས་བྱའོ་ཞེས་བློའི་སྟོབས་བསྐྱེད་པ་འདི་ནི་ལས་ཀྱི་ང་རྒྱལ་ཉིད་དོ། །གཉིས་པ་ནི། སེམས་ཅན་གྱི་བྱ་བ་གཞན་ལ་མི་ལྟོས་པར་རང་གིས་བསྒྲུབ་པར་བྱ་སྟེ། ཉོན་མོངས་པས་དབང་མེད་པར་གྱུར་པའི་འཇིག་རྟེན་པ་འདིས་རང་དོན་ཡང་སྒྲུབ་པར་ མི་ནུས་པས། འགྲོ་བས་བདག་ལྟར་གཞན་དོན་དུ་དགེ་བ་ལ་བརྩོན་པར་མི་ནུས་ཏེ། དེ་དག་ལ་ལྟོས་ཀྱང་ཕན་པ་མེད་པ་དེ་བས་བདག་གིས་གཞན་དོན་གྱི་བྱ་བ་འདི་ཐམས་ཅད་བྱའོ་སྙམ་པའོ། །གསུམ་པ་ནི། གཞན་ཡང་ཞིང་ལས་སོགས་
