འཇོམས་པར་འགྱུར་བས་སྡིག་པ་སྤོང་བ་ལ་འབད་པར་བྱའོ། །འབྲས་བུའི་ཡོན་ཏན་ནི་འབྲས་བུའི་རང་བཞིན་གྱི་ཚུལ་ལོ། །གཉིས་པ་ནི། དགེ་བའི་ཆོས་ལ་གོམས་པར་བྱས་པས་རྒྱལ་བའི་སྲས་པོ་རྣམས་བདེ་བ་ཅན་གྱི་ཞིང་སོགས་སུ་སྐྱེ་བ་ན། སྐྱེ་ གནས་རྒྱ་ཆེ་ཞིང་ཡངས་པ་དྲི་བཟང་ཞིང་ཡིད་དུ་འོང་བ་བདེ་བ་སྐྱེད་པའི་རེག་བྱ་བསིལ་བའི་སྐྱེ་གནས་ཀྱི་ཁྱད་པར་པདྨའི་སྙིང་པོར་གནས་པའོ། །འཇིག་རྟེན་པའི་ཁ་ཟས་ཀྱིས་འཚོ་བ་ལས་ཁྱད་པར་དུ་གྱུར་པ་ཡན་ལག་དྲུག་ཅུ་དང་ལྡན་པའི་རྒྱལ་བའི་ གསུང་སྙན་པ་ཐོས་པ་དང༌། དེའི་བརྗོད་བྱ་དེ་ཁོ་ན་ཉིད་རྟོགས་པའི་ཟས་ཀྱིས་གཟི་བརྗིད་དང་མདངས་བསྐྱེད་པར་བྱས་ནས། སྐྱེ་བའི་ཁྱད་པར་ཐུབ་པ་དེ་བཞིན་གཤེགས་པའི་འོད་ཀྱིས་ཁ་ཕྱེ་ཞིང་རྒྱས་པར་བྱས་པའི་པདྨ་ལས་བྱུང་བའོ། །ལུས་ ཀྱི་ཁྱད་པར་མཚན་དཔེས་སྤྲས་པའི་ལུས་མཆོག་ཅན་ནོ། །ཡོངས་སུ་འཛིན་པའི་ཁྱད་པར་འོད་དཔག་མེད་སོགས་རྒྱལ་བའི་མདུན་ན་གནས་ནས་དེའི་ཆོས་ཀྱིས་སྐྱོང་བ་སྟེ། ཁྱད་པར་དེ་དག་དང་ལྡན་པའི་སྒོ་ནས་བདེ་གཤེགས་སྲས་སུ་གཅིག་ཏུ་ དཀར་བའི་ལས་དགེ་བས་འགྱུར་རོ། །གསུམ་པ་ནི། སྲོག་གཅོད་པ་ལ་སོགས་པའི་ལས་ཀྱིས་དམྱལ་བར་གཤིན་རྗེའི་སྐྱེས་བུས་པགས་པ་མ་ལུས་པ་བཤུས་པས་སྡུག་བསྔལ་གྱིས་ཤིན་ཏུ་ཉམ་ཐག་ཅིང་ལོངས་སྤྱོད་ཀྱི་ཁྱད་པར་རབ་ཏུ་ཚ་བའི་མེ་ ཡིས་བཞུས་པའི་ཟངས་ཞུན་གྱི་ཁུ་བ་ལུས་ལ་བླུགས་པར་གྱུར་པས་བཟོད་དཀའ་ལ། དེར་མ་ཟད་མེ་འབར་བའི་རལ་གྲི་དང་མདུང་ཐུང་གིས་བསྣུན་པས་ཤའི་དུམ་བུ་བརྒྱ་ཕྲག་དུ་མར་ལྷགས་ཤིང་འཐོར་བར་གྱུར་པའོ། །གནས་ཀྱི་ཁྱད་པར་ཤིན་
