ད་དུང་ཁྱོད་ཀྱིས་མི་ཤེས་སམ། དགེ་བ་ལ་བརྩོན་པར་བྱའོ། །
གཉིས་པ་ནི། རྒན་གཞོན་བར་མ་ལ་སོགས་པའི་རང་སྡེ་འཆི་བདག་གིས་རིམས་ཀྱིས་གསོད་པ་ཡང༌། ཁྱོད་ཀྱིས་མངོན་སུམ་དུ་མཐོང་བར་མ་གྱུར་ཏམ་དེ་ལྟར་མཐོང་ཡང་འོན་ཀྱང་ གཉིད་ལ་བརྟེན་པའི་སྲེད་པ་གང་ཡིན་པ་དེ་ནི་མི་རིགས་ཏེ། དཔེར་ན་གདོལ་པས་རིམས་ཀྱིས་གསོད་པའི་མ་ཧེ་གཞན་གསོད་པ་མཐོང་ཡང༌། སྐྲག་པ་མེད་ཅིང་དལ་བར་གནས་པ་གདོལ་བ་དང་ནི་མ་ཧེ་བཞིན་ནོ། །
གཉིས་པ་ལ་བཞི། རང་ཉིད་འཆི་ བདག་གི་དབང་དུ་གྱུར་པས་ལེ་ལོ་མི་བྱ་བ་དང༌། མྱུར་བར་འཆི་བས་དགེ་བ་ལ་འབད་པ་དང༌། འཆི་བའི་ཚེ་ལེ་ལོ་སྤོང་བ་དུས་མ་ཡིན་པ་དང༌། འདོད་པའི་ལས་མ་བྱས་པར་གློ་བུར་དུ་འཆི་བས་ལེ་ལོ་མི་བྱ་བའོ། །
དང་པོ་ནི། འཆི་བ་མེད་པའི་གྲོང་ཁྱེར་དུ་ འབྲོས་པའི་ལམ་ནི་ཀུན་ནས་བཀག་ནས་སུ་གདོལ་པ་ལྟ་བུའི་འཆི་བདག་གིས་ནི་གསད་བྱར་བལྟ་བཞིན་དུ། ཇི་ལྟར་ཁྱོད་ནི་མ་ཧེ་བག་མེད་པ་ལྟར་ཟས་ཟ་བ་ལ་དགའ་ཞིང་འདི་ལྟར་གཉིད་ལོག་པའི་སྲེད་པ་ལ་ཇི་ལྟར་དགའ་བག་མེད་པར་མི་རིགས་ སོ། །
གཉིས་པ་ནི། ད་དུང་ཅུང་ཟད་ལོང་ཡོད་ཅེ་ན། མྱུར་བ་ཉིད་དུ་འཆི་བར་འགྱུར་བས་ཇི་སྲིད་དུ་འཆི་བདག་གིས་མ་ཟིན་པ་དེ་སྲིད་དུ་ནི་ཚོགས་བསག་པར་བྱའོ། །
གསུམ་པ་ནི། འཆི་བས་ཟིན་པ་དེའི་ཚེ་ལེ་ལོ་སྤངས་ཀྱང་ནི་དུས་མ་ཡིན་པར་ འབད་པས་ཅི་ཞིག་བྱ། དགོས་པ་ཅུང་ཟད་ཀྱང་མི་འགྲུབ་པའི་ཕྱིར་རོ། །
བཞི་པ་ནི། མྱུར་དུ་འཆི་བས་ལས་འདི་ནི་མ་བྱས་པ་དང་ཅུང་ཟད་བརྩམས་པ་དང༌། བྱ་བ་འདི་ཕྱེད་ཙམ་བྱས་པར་གནས་པ་ལ་གློ་བུར་དུ་འཆི་བདག་འོངས་ནས་ནི་འགྱོད་བཞིན་
