༄༅། །མི་ནུས་སྙམ་དུ་བདག་ཉིད་ལ་བརྙས་པའོ། །གཉིས་པ་ལ་གསུམ། སྙོམ་ལས་ལ་རོ་མྱང་བའི་ལེ་ལོ་སྤང་བ་དང༌། བྱ་བ་ངན་པ་ལ་ཞེན་པའི་ལེ་ལོ་སྤང་བ་དང༌། དགེ་བ་ལ་སྒྱིད་ལུག་པའི་ལེ་ལོ་སྤང་བའོ། །དང་པོ་ལ་གཉིས། ལེ་ ལོའི་རྒྱུ་བརྟགས་ནས་སྤང་བ་དང༌། ཇི་ལྟར་སྤོང་བའི་ཚུལ་ལོ། །དང་པོ་ནི། ལེ་ལོ་སྐྱེ་བའི་རྒྱུ་གང་ཞེ་ན། དགེ་བ་ལ་མི་འཇུག་པའི་སྙོམ་ལས་ལ་བདེ་བར་བཟུང་ནས་དེ་ལ་ཞེན་པའི་བདེ་བའི་རོ་མྱང་བ་དང༌། གཉིད་ལ་བརྟེན་བའི་སྲེད་པ་ཡིས་ཀྱང་ ལེ་ལོ་སྐྱེད་པར་བྱེད་ལ་འཁོར་བ་ལ་ཅུང་ཟད་ཀྱང་མི་སྐྲག་པར་འཁོར་བའི་སྡུག་བསྔལ་ལ་མི་སྐྱོ་བ་ལས། ལེ་ལོ་ཉེ་བར་སྐྱེ་བར་འགྱུར་བས་རྒྱུ་ངོས་བཟུང་ནས་ལེ་ལོ་འགོག་པ་ལ་བརྩོན་པར་བྱའོ། །གཉིས་པ་ལ་གཉིས། ཚེ་འདིའི་ཉེས་ དམིགས་བསམས་ནས་ལེ་ལོ་སྤང་བ་དང༌། ཚེ་ཕྱི་མའི་སྡུག་བསྔལ་བསམས་ནས་ལེ་ལོ་སྤང་བའོ། །དང་པོ་ལ་གསུམ། མྱུར་དུ་འཆི་བས་འཇོམས་པ་དཔེས་བཤད་པ་དང༌། རང་ཉིད་ཀྱང་འཆི་བའི་གཞན་དབང་དུ་གྱུར་པས་ལོང་ཡོད་བྱར་མི་ རུང་བ་དང༌། དགེ་བ་ལ་མ་འབད་ན་སྡུག་བསྔལ་གྱིས་གདུངས་པར་འགྱུར་བའོ། །དང་པོ་ལ་གཉིས། འཆི་བས་འཇོམས་པ་མངོན་སུམ་དུ་མཐོང་བ་དང༌། དེ་དཔེས་བཤད་པའོ། །དང་པོ་ནི། རི་དྭགས་རྒྱར་ཆུད་ན་འཆི་བ་ལས་མི་ཐར་བ་ལྟར་ རྔོན་པ་ལྟ་བུ་ལེ་ལོ་ལ་སོགས་པའི་ཉོན་མོངས་རྒྱ་བས་བཤོར་ཏེ་དབང་དུ་བྱས་ནས་ནི། ཡང་སྲིད་ཕྱི་མར་ཉིང་མཚམས་སྦྱོར་བའི་སྐྱེ་བའི་རྒྱར་ནི་ཆུད་པར་གྱུར་ནས་འཆི་བདག་ཁར་ནི་སྐྱེ་བོ་དུ་མ་སོང་བར་གྱུར་པ་དང༌། འགྲོ་བར་འགྱུར་བ་ཅི་སྟེ་
