༄༅། །གཉིས། དངོས་ཀྱི་དོན་དང༌། རྩོད་པ་སྤང་བའོ། །དང་པོ་ལ་ལྔ། གཞན་གྱིས་རང་ལ་གནོད་པ་བྱེད་པ་རང་གི་ཉེས་པར་བསམ་པ་དང༌། སྡུག་བསྔལ་གྱི་རྒྱུ་ལུས་བཟུང་བའི་ཉེས་དམིགས་ཡིན་པ་དང༌། སྐྱེ་བ་སྔ་མར་སྡུག་ བསྔལ་གྱི་རྒྱུ་ལ་སྲེད་པ་བྱས་པའི་ཉེས་དམིགས་ཡིན་པ་དང༌། རང་གི་ལས་ཀྱིས་གཞན་སྡུག་བསྔལ་གྱི་རྒྱུ་ལ་སྦྱར་བ་ཡིན་པས་དེ་ལ་ཁྲོ་བར་མི་རིགས་པ་དང༌། ཁྲོ་བ་ཉིད་ཕྱིན་ཅི་ལོག་ཅིང་མི་རིགས་པའོ། །དང་པོ་ནི། བདག་གིས་སྔོན་ཆད་ ཚེ་སྔ་མ་ལ་སེམས་ཅན་ལ་རང་ལ་འབྱུང་བ་འདི་འདྲ་བའི་གནོད་པ་བྱས་པ་དེ་བས་ན་སེམས་ཅན་འཚེ་བར་བྱེད་པ་བདག་ལ་ད་ལྟ་བྱུང་བའི་གནོད་པ་འདི་ལྟ་བུ་འབྱུང་རིགས་སྙམ་དུ་བསམས་ལ་བཟོད་པར་བྱའོ། །གཉིས་པ་ནི། རྒྱུ་མཚན་ འདིས་ཀྱང་ཁྲོ་བར་མི་རིགས་ཏེ་ཕ་རོལ་པོ་དེའི་མཚོན་དང་བདག་གི་ལུས་གཉིས་ཀ་རང་གི་སྡུག་བསྔལ་གྱི་རྒྱུ་ཡིན་ཏེ། འདི་ལྟར་གང་ཟག་དེས་མཚོན་ཕྱུང་། བདག་གིས་ལུས་ཕྱུང་ནས་གཉིས་ཀས་རང་གི་སྡུག་བསྔལ་བྱས་པ་ཡིན་ན་གང་ཞིག་ ལ་ནི་ཁྲོ་བར་བྱ་ཕ་རོལ་འབའ་ཞིག་ལ་ཁྲོ་བར་མི་རིགས་སོ། །ཤུ་བ་མིའི་གཟུགས་འདྲ་བ་ཅུང་ཟད་ཙམ་ཡང་རེག་ཏུ་མི་བཟོད་པའི་སྡུག་བསྔལ་ཅན་ལུས་སོགས་ལ་སྲེད་པ་དང༌། མ་རིག་པས་བློ་གྲོས་ཀྱི་མིག་མདོངས་པ་བདག་གིས་བཟུང་བར་ གྱུར་ན་ཚེར་མས་ཀྱང་འཇོམས་ནུས་པས་དེ་ལ་གནོད་པ་སུ་ལ་ཁྲོ་རང་གི་ཉེས་པའོ་སྙམ་དུ་བསམ་པར་བྱའོ། །གསུམ་པ་ནི། བྱིས་པ་རྣམས་སྡུག་བསྔལ་མི་འདོད་ཅིང་སྲོག་གཅོད་སོགས་སྡུག་བསྔལ་གྱི་རྒྱུ་ལ་བརྐམ་ཞིང་སྲེད་པས་ན་སྔར་གྱི་
