༄༅། །དབང་མེད་པའི་ཕྱིར་རོ། །དཔེར་ན་མི་འདོད་བཞིན་དུ་ཡང་རྐྱེན་ཚང་བས་ནད་འདི་འབྱུང་བར་འགྱུར་བ་ལྟར་དེ་བཞིན་དུ་ཞེ་སྡང་ཡང་གང་ཟག་དེ་མི་འདོད་བཞིན་དུ་ཡང་ཡིད་མི་བདེ་བ་ལ་སོགས་པའི་རྒྱུས་ནན་གྱིས་ཉོན་མོངས་ འབྱུང་བར་འགྱུར་བས། ཁྲོ་ན་ཉོན་མོངས་ལ་ཁྲོ་བར་རིགས་ཀྱི་གང་ཟག་ལ་ཁྲོ་བར་མི་རིགས་སོ། །
གཉིས་པ་ནི། ཕ་རོལ་པོས་གནོད་པ་བྱ་བར་བསམས་པས་ཉོན་མོངས་དང་མི་མཚུངས་སོ་ཞེ་ན། ཁྲོ་བ་རྒྱུ་རྣམས་ཀྱིས་བསྐྱེད་པར་བྱ་ཞེས་མ་ བསམས་ཀྱང་རྒྱུ་ཚང་བས་སྐྱེ་བོ་རྣམས་ནི་གྱི་ན་རང་དགར་ཁྲོ་བ་བསྐྱེད་ལ། ཉོན་མོངས་བསྐྱེད་པར་བྱ་ཞེས་མ་བསམས་ཀྱང་ཁྲོ་བ་དེ་བཞིན་དུ་སྐྱེ་བར་འགྱུར་གྱི་རང་ལ་རང་དབང་མེད་པའི་ཕྱིར་རོ། །ཡང་ན་ཕྱེད་སྔ་མ་གང་ཟག་དང་ཕྱེད་ཕྱི་ མ་ཉོན་མོངས་ཀྱི་རྐྱེན་ལ་བཤད་དོ། །
གསུམ་པ་ནི། ཉོན་མོངས་པའི་ཉེས་པ་ཇི་སྙེད་པ་ཐམས་ཅད་དང༌། དེས་ཀུན་ནས་བསླང་བའི་སྡིག་པ་རྣམ་པ་སྣ་ཚོགས་པ་དེ་ཀུན་ཀྱང་རྐྱེན་གྱི་སྟོབས་ལས་བྱུང་བས་རང་ལ་རང་དབང་ཡོད་པ་མ་ཡིན་ནོ། ། དེས་ན་ཆུ་ཐུར་དུ་འགྲོ་བ་ལ་ཁྲོ་བར་མི་རིགས་པ་ལྟར་རྒྱུ་མཚན་དེ་དག་བསམས་ནས་ཁྲོ་བ་དགག་པར་བྱའོ། །
གཉིས་པ་ནི། དེས་ན་ཉོན་མོངས་སོགས་སྡུག་བསྔལ་སྐྱེད་པའི་རྐྱེན་རྣམས་ཚོགས་པ་དེ་དག་ཀྱང་བདག་གིས་སྡུག་བསྔལ་འདི་ བསྐྱེད་པར་བྱའོ་ཞེས་སེམས་པ་མེད་ལ། དེས་བསྐྱེད་པའི་སྡུག་བསྔལ་དེ་ཡང་འདིས་བདག་བསྐྱེད་ཅེས་སེམས་པ་ཡོད་པ་མ་ཡིན་ནོ། །དེས་ན་ཕ་རོལ་པོས་གནོད་པ་བྱ་བར་བསམས་པ་རྒྱུ་མཚན་དུ་བྱས་ནས་ཁྲོ་བ་བསྐྱེད་པར་མི་རིགས་སོ། །
