ཆོས་སྐུར་འགྲོ་བ་དང་། སངས་རྒྱས་ཀྱི་ཡེ་ཤེས་མཆོག་ཏུ་རྨད་དུ་བྱུང་བ་མཆོག་ལ་རེག་པ་དང་། ཆོས་ཀྱི་སྦྱིན་པ་རབ་མཆོག་དམ་པ་གཞན་ལ་སྦྱིན་པར་འདོད་པ་དག་གིས་ཕན་མཛད་སངས་རྒྱས་འབྱུང་བའི་གནས་མཆོག་ཤེར་ཕྱིན་འདི་ལ་ བསྟེན་པར་གྱིས་ཤིག །མཐོང་བའི་ལམ་གྱི་བསླབ་པ་འདི་ནི་འདྲེན་པ་སངས་རྒྱས་ཀྱིས་བཤད་པའི་བསླབ་པ་ཡོངས་སུ་རྫོགས་པ་བསླབ་པ་འོག་མ་ཇི་སྙེད་ཡོད་པ་ཀུན་གྱི་ནང་ན་མཆོག་དང་གོང་ན་མེད་པ་ཡིན་ནོ། །དེས་ན་མཁས་པ་གང་ཞིག་ བསླབ་པ་ཀུན་གྱི་ཕ་རོལ་ཏུ་འགྲོ་བར་འདོད་པ་དེས་ནི། སངས་རྒྱས་ཀྱི་བསླབ་པ་ཟད་མི་སྐྱེ་ཤེས་པའི་ཤེར་ཕྱིན་འདིར་སློབ་བོ། །འདི་ནི་ཆོས་ཀྱི་གཏེར་མཆོག་དང་ཆོས་ཀྱི་མཛོད་དམ་པ་ཡིན་ཞིང་། སངས་རྒྱས་འབྱུང་བའི་རིགས་དམ་པ་ཡིན་ ལ་འགྲོ་བའི་བདེ་བ་དང་སྐྱིད་པ་འབྱུང་བའི་མཛོད་ཡིན་ནོ། །རྒྱལ་བ་འདས་པ་དང་མ་བྱོན་པ་དང་ད་ལྟ་བཞུགས་པའི་འཇིག་རྟེན་གྱི་མགོན་པོ་དེ་དག་རྣམས་ནི། ལམ་འདི་ལས་འཁྲུངས་ཀྱང་ཆོས་ཀྱི་དབྱིངས་དང་མཐོང་བའི་ལམ་ནི་ཟད་པར་མི་འགྱུར་ རོ། །དཔེར་ན་འཇིག་རྟེན་གྱི་ཤིང་དང་འབྲས་བུ་དང་མེ་ཏོག་དང་ནགས་ཚལ་ཇི་སྙེད་ཡོད་པ་དེ་དག་ཐམས་ཅད་ས་ལ་བརྟེན་ཅིང་དེ་ལས་ཡང་དག་འབྱུང་ཞིང་འཐོན་པ་སྟེ་སྐྱེའོ། །འོན་ཀྱང་ས་ལ་ཟད་པ་མེད་ཅིང་འཕེལ་བ་མེད་ལ་ཡོངས་སུ་མི་ཉམས་ ཤིང་ས་དེས་ངས་འདི་དག་བསྐྱེད་པར་བྱའོ་སྙམ་དུ་རྣམ་པར་མི་རྟོག་ཅིང་ངལ་ཞིང་དུབ་སྟེ་སྐྱོ་བ་མེད་དོ། །དེ་བཞིན་དུ་སངས་རྒྱས་དང་དེའི་སྲས་བྱང་སེམས་དང་ཉན་ཐོས་དང་རང་རྒྱལ་དང་ལྷ་རྣམས་དང་། འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་
