༄༅། །སྨྲས་པ། རྒྱལ་ཡུམ་རྒྱས་འབྲིང་བསྡུས་གསུམ་གྱི། །དོན་གྱི་སྙིང་པོ་ཀུན་འདུས་པ། །ཤེར་ཕྱིན་སྡུད་པ་ཞེས་གྲགས་པའི། །དགོངས་འགྲེལ་རིན་ཆེན་འདི་ན་མཆིས། །གཞུང་འདིའི་དོན་རྣམས་མ་ལུས་པ། །འཕགས་པའི་ཡུལ་ཏེ་བདག་ལྟ་བུའི། །སྤྱོད་ཡུལ་མིན་ཡང་དད་སྟོབས་ཀྱིས། ། དགོངས་དོན་ཕྱོགས་ཙམ་འགྲེལ་ལ་བརྩོན། །རྒྱས་པར་བཀྲལ་ན་ཚིག་ཚོགས་ཀྱི། །སྤྲོས་པས་འཇིགས་ཏེ་ཚིག་དོན་ཙམ། །སེང་བཟང་ལ་སོགས་མཁས་གཞུང་དང་། །བསྟུན་ནས་རྣམ་པར་དཔྱོད་པས་བཀྲལ། །ལེགས་པར་བཤད་ཀུན་བླ་མ་དང་། །ལྷ་ཡི་དྲིན་ཡིན་ཉེས་བཤད་ཆ། །བདག་བློའི་སྐྱོན་ཏེ་ནོངས་པ་ཀུན། །ཐུབ་ དབང་མཆོག་གི་དྲུང་དུ་བཤགས། །ཚུལ་འདིར་འབད་པའི་དགེ་ལེགས་ཆབ། །དུས་གསུམ་རྣམ་དཀར་ཀླུང་གཞན་དང་། ལྷན་ཅིག་ཐེག་ཆེན་ལམ་བཟང་ནས། །ཀུན་མཁྱེན་རྒྱ་མཚོར་འཇུག་གྱུར་ཅིག །ཅེས་སྡུད་པའི་འགྲེལ་པ་རྒྱལ་བའི་དགོངས་གསལ་འདི་ནི། ཡི་གེ་འདྲི་ཀློག་ལ་བློ་གསལ་བ་དད་སྟོབས་ལྡན་པའི་བྲིས་པ་ཏཱ་ ཡི་ལ་ལུང་བློ་བཟང་དོན་གྲུབ་ཀྱིས། ཉིད་ཀྱིས་མཛད་པའི་རྡོར་གཅོད་ཀྱི་འགྲེལ་པ་ཞིག་འདུག་པས། མདོ་སྡུད་པ་འདི་ལ་ཡང་འགྲེལ་པ་ཞིག་བགྱིས་ན་ལེགས་ཞེས་བསྐུལ་བ་ལ་བརྟེན་ནས། གཡོ་སའི་ཁྲི་ཟུར་ཤཱཀ་བཙུན་གྲགས་པ་བཤད་སྒྲུབ་ཀྱིས་གཞུང་འདིའི་དོན་ཟབ་ཅིང་རྒྱ་ཆེ་བས་དཀའ་ཞིང་བཀྲལ་ཡང་གཞན་ གྱིས་གོ་མི་ནུས་སྙམ་ཡང་། འདིའི་དགོངས་པ་རྫོགས་པར་འགྲེལ་པའི་ལུས་རྟེན་ནི་ཤིན་ཏུ་རྙེད་པར་དཀའ་ཞིང་། ད་རེས་ཀྱི་རྟེན་འདིའི་ཐོག་ནས་ཅུང་ཟད་འགྲེལ་ནུས་འདུག་པས་འདི་ལ་སྙིང་པོ་ཞིག་བླང་བར་བྱའོ་སྙམ་པའི་བསམ་པས་ཀྱང་རང་ལོ་དོན་གསུམ་པ་མེ་ཡོས་བཅུ་གསུམ་པའི་ཐོག་ཅོ་ནེའི་དགོན་ཉིད་དུ་སྦྱར་བའི་ཡི་གེ་ པ་ནི་བསྐུལ་བ་པོ་ཉིད་དོ།། ༈ འདི་བྲིས་དགེ་བའི་རྩ་བ་གང་ཡོང་བས། །འདི་ཡི་རྗེས་སུ་ཞུགས་པའི་གང་ཟག་རྣམས། །འདས་དང་མ་འོངས་ད་ལྟར་འདྲེན་པ་ཡི། །རྒྱལ་བ་དེ་དག་མངོན་དུ་མཇལ་གྱུར་ཅིག །མངྒ་ལཾ།། །།
