ཏུ་སྤོས་ཐོགས་ལ། པུས་མོ་གཡས་པའི་ལྷ་ང་ས་ལ་བཙུགས་ཏེ། ལྕེ་ཧཱུཾ་ལས་རྡོ་རྗེར་བྱས་ཏེ། བཅོམ་ལྡན་ཞེས་པ་ནས། ཐུགས་བརྩེར་ལྡན་ཞེས་པ་ནས། གནང་བར་མཛོད་ཅེས་པའི་བར་དུ་བརྗོད་པས་ལྷ་རྣམས་བསྐུལ་ཏེ། དེ་ཡང་སང་ནི་ ཞེས་པའི་སྐབས་སུ་དེ་རིང་ཞེས་པ་སྦྱར་ལ། དེ་ནས་ཡེ་ཤེས་སེམས་དཔའ་སྤྱན་དྲངས་ལ། ཡོན་ཆབ་དང་ཞབས་བསིལ་ལ་སོགས་པའི་མཆོད་པའི་ཚོགས་ཕུལ་ལ་ལྷ་ཐམས་ཅད་ཀྱི་སྐུ་གཟུགས་ལ་བསྟིམས་ཏེ། ཡང་མཆོད་པ་བྱས་ལ། ཨོཾ་བཛྲ་ཨཱ་བྷ་ར་ཎ་ཝ་པུ་ཥ་ནེ་སྭཱ་ཧཱ། ཞེས་པས་རྒྱན་ཅི་འབྱོར་པ་ཡང་འབུལ་ལོ། །དེ་ནས་བསྟོད་པ་ཡང་བྱ་སྟེ། གསེར་གྱི་ཐུར་མ་ཨཉྫ་ན་བྱུགས་པས་སྤྱན་ཕྱེ་སྟེ། སྔགས་འདིས་སོ། །ཨོཾ་ཙཀྵུ་ས་མནྟ་ཙཀྵུ་བི་ཤོ་དྷ་ནི་བཛྲ་སྭཱ་ཧཱ། ཞེས་ཟློས་ཤིང་། དེ་ནས་དི་བྱ་ཨགྣེ་ས་མཱ་དྷི་དྷྱ་ན་པྲ་ཎ་ནི་སྭཱ་ཧཱ། ཞེས་བརྗོད་ཅིང་། བཟའ་བ་བཟང་པོ་ཅུང་ཟད་ཅིག་ཟངས་བུར་སྐུ་ལ་གསོལ། །དེ་ནས་བདུད་རྩི་འཁྱིལ་པའི་སྔགས་བཟླས་ཤིང་། སྐུའི་ཞབས་དང་། རྐེད་པ་དང་དབུ་ལ། ལག་པ་གཡས་པ་གཅུས་པས་རྡོ་རྗེ་ལན་གསུམ་དུ་བསྐོར་ཏེ་བརྟན་པར་བྱས་ལ། སྟེགས་བུའི་སྟེང་དུ་སྐུའི་ཆ་གསུམ་ པའི་ཁྲི་ལ། ཧ་ཅང་ཡང་མ་འདུད་པ་དང་། མ་གྱེད་པ་དང་། མ་ཡོ་བར་ཅི་མཛེས་སུ་པྲ་ཏིཥྛ་བཛྲ་སྭཱ་ཧཱ། ཞེས་བརྗོད་ལ་བཞག་གོ། །དེ་ནས་སློབ་མ་བརྗོད་པ་ནི། ཁྱོད་ཀྱིས་ང་ལ་གསོལ་བཏབ་པའི། །སྐུ་གཟུགས་དག་ནི་ཁྱད་པར་དུ། །ཇི་སྐད་གསུངས་བཞིན་རབ་གནས་ པའི། །དེ་ནི་ངས་ཀྱང་བྱས་གྱུར་ཏེ། །ཁྱོད་ཀྱིས་དེ་ནི་རབ་རྫོགས་པས། །ཅི་བདེ་བར་ནི་མཆོད་པར་གྱིས། །སློབ་མས་ཀྱང་སྐུ་ལ་ཅི་འབྱོར་བ་ཕུལ་ལ་བསྟོད་པར་ཡང་བྱ་སྟེ། ལན་དུ་མར་བསྐོར་བ་བྱ་བའོ། །དེ་ནས་སློབ་དཔོན་གྱིས་གཏོར་མ་བྱིན་ལ། སྐུ་གཟུགས་བྱིན་ཆེ་ཞིང་བཀྲ་ ཤིས་པ་དང་། ཡུན་རིང་དུ་བཞུགས་པའི་ཕྱིར་ཆོས་སྐྱོང་བའི་སྲུང་མ་ལ་གསོལ་བ་གདབ་པོ། །འབྱོར་པ་དེ་ཡོད་ན་ཟངས་བུར་ཟས་ཕུལ་བའི་རྗེས་ལ་རྒྱས་པའི་སྦྱིན་སྲེག་བྱའོ། །འདི་ནི་རབ་གནས་རྒྱས་པའོ།། །།
དོན་ཚན་གཉིས་པ་རབ་གནས་ཀྱི་ཆོ་ག་ཟབ་མོ་བཤད་པ།
རབ་གནས་མདོར་བསྡུས་པ་ནི་སྟ་གོན་ལ་གནས་པ་མི་བྱ་
