རེ་འདི་ནི་ཀློག་ཚུལ་ཡིན་གྱི་ཡིག་གཟུགས་ལ་དེ་མི་མཚུངས་པས་སྐྱོན་མེད་དོ་ཞེ་ན། འོ་ན་ལྷའི་སྐད་ལེགས་པར་སྦྱར་བ་ཐམས་ཅད་ཡི་གེའི་གཟུགས་ཙམ་གྱི་ཕྱིར་ཡིན་པར་སྨྲ་བ་གདོན་མི་ཟ་བས་ཁྱེད་ཀྱི་གནས་སྐབས་ཅི་འདྲར་གྱུར་ཅིག་གུ། དེས་ན་ཥ྄་ཉིད་ཏི་ལ་ཡར་སྦྱར་ཏེ་ཥ྄འི་སྒྲ་ཟུར་
ཐོན་པར་བཀླག་དགོས་པ་རིགས་པས་གྲུབ་ཅིང་འཕགས་ཡུལ་བ་དག་གི་ངག་ལས་ཀྱང་ཐོས་སོ། །
ཉེར་བསྒྱུར་སུ་སྔོན་མའི་ཏོ་ཥྱ་ལ་སི་བྱིན་པ་ཏོ་ཥྱཿཞེས་པར་གྲུབ་སྟེ་ལེགས་པར་ཚིམ་པའམ་ཤིན་ཏུ་ཚིམ་པ། མེ་བདག །བྷ་ཝ་མཛོད་ཅེས་པར་འགྱུར་ཏེ་རྣམ་བཅད་ཨུ་རུ་བསྒྱུར་ཏེ་མཚམས་
སྦྱར་བས་སུ་ཏོ་ཥྱོ་མེ་བྷ་ཝ་ཞེས་སོ། །དེས་ན་བདག་འཕོ་འགྱུར་སྤྲོས་པ་དང་བྲལ་བའི་དགའ་བ་དང་བདེ་བ་ཆེན་པོའི་རོ་ཡིས་ཤིན་ཏུ་ཚིམ་པར་མཛོད་ཅིག་པར་བསྐུལ་བ་སྟེ་ཚོར་བདེ་ཙམ་གྱིས་ནི་མ་ཡིན་ནོ། །ཀློག་ཚུལ་ལ་འགའ་ཞིག་གིས་ཏོས་ཡོ་ཞེས་དང་། འགའ་ཞིག་གིས་ཏོ་ཥ་ཡོ་ ཞེས་
ཀློག་པ་ནི་ནམ་ཡང་མི་འཐད་དེ། སྔ་མས་ཥ྄འི་སྒྲ་ཟུར་མ་ཐོན་པའི་ཕྱིར་དང་། ཕྱི་མས་ཥ྄་ཡིག་སྲོག་ཅན་དུ་བཀླགས་པའི་ཕྱིར་རོ། །འོ་ན་ཇི་ལྟར་ཞེ་ན་ཥ྄་ཡིག་གི་ཟུར་ཐོན་ཙམ་གྱིས་ཏོ་ལ་ཡར་སྦྱར་ཏེ་ཀློག་པ་ཡིན་ཞིང་འཆད་འགྱུར་པོཥྱོ་ལའང་འགྲེའོ། །དེ་བཞིན་དུ་སུ་པོ་ཥྱཿཤིན་ཏུ་
རྒྱས་པའམ་ལེགས་པར་རྒྱས་པ། མེ་བྷ་ཝ་སྔ་མ་རྣམས་དང་འདྲ་བ་སྟེ་བསྡོམས་པར་སུ་པོ་ཥྱོ་མེ་བྷ་ཝ་ཞེས་སོ། །དེའང་བདག་ཤིན་ཏུ་རྒྱས་པར་མཛོད་ཅེས་པ་སྟེ་བདེ་སྟོང་གཉིས་མེད་ཀྱི་ཡེ་ཤེས་རྒྱས་པར་མཛོད་ཅིག་པའི་དོན་ནོ། །ཉེར་བསྒྱུར་ཨ་ནུ་སྔོན་མའི་རཀྟ་ལ་སི་བྱིན་པ་ཨ་ནུ་རཀྟཿནི་
རྗེས་སུ་ཆགས་པ་དང་། མེ་བྷ་ཝ་སྔ་མ་བཞིན་མཚམས་སྦྱར་བས་ཨ་ནུ་རཀྟོ་མེ་བྷ་ཝ་ཞེས་པ་བདག་ལ་རྗེས་སུ་ཆགས་པར་མཛོད་ཅེས་པར་འགྱུར་ཏེ། དོན་དུ་ཆགས་པའི་དྲི་མ་རིང་དུ་སྤངས་པའི་ཟུང་འཇུག་གི་སྙིང་རྗེས་ཆེན་པོ་ལ་རྡོ་རྗེ་ཆགས་ཆེན་ཞེས་བཏགས་པ་དེས་བདག་ལ་རྗེས་སུ་བརྩེ་བར་
