Page:Пици палакст (А. В. Дуняшин, 1930).djvu/65

ОБЬ-ЛЕЕНТЬ ЧИРЕСЭ

I

К

ОДА МЕНЕЛЕСЬ ванькстэяк ванькс — янтарень кондямо, кода менеленть куншкасо обед шкава пиди чись, эжди масторонть ды ломатнень — сестэ а мельсэ аштят кевень кудосо (учреждениясо), сестэ тошна ошсонть эрямось, сестэ кадовлик ошонть ды туевлить паксяв, вирев, лей лангов — косо пиже луга, пиже тарад, косо варма кошт, косо менелеськак седе мазы ды чиськак чевцтэ эжди.

Истямо шкасто молевлить вирев ды вановлить, кода коткудавтнэ сроить эсист кудост-пизэст, кода пиже понав сукснэ каштордыть лопатнень потмова — вановлить ды кунсоловлить, кода эри-ашти виресь.

Истямо шкасто мельстэть а тукшны эрзянь велесь, косо шачить-касыть, косо ней самай моли покш робута — синтрить-тапить ташто велетнень, ташто эрямо койтнень, сроить од, колективень веле. Эрзя-мокшонь од веле.

* * *

Васолдо, пек васолдо чуди Обь-леесь. Туркестанонь степнень маласто северной ледовитой океанс — гуйкс таргавсь Сибиренть трокс.

Куроксто чуди Обь-леесь, чов марто чави берёконтень волнась, буто жалуби, мекс сон урузокс эри, мекс сонзэ кизэ колияк а прядови.

Бороздить Обь-леенть парахот, сезнить чама киськензэ вишка веншт (лоткат), черепаха лацо уить эзганзо сюрдов-сярдов плот, сон яла чуди ды чуди — кувака сонзэ кизэ, кувать, кувать нать а прядови.

Кода ванат чуди леенть ланкс — месть ансяк а ледить мелезэть, мезень арьсимат а совить пря потмозот.

61