Весть калонь кундайсь ляйса
Шинь пидеф шаманц штась,
А нюдиксне валомне
Эсь пряняснон шукасть.
Керсь цёрась коське нюдикс,
Пяк морамац ни сась,
Сон почкафтозе эзненц
И пачканза уфась.
И цёрась нюдиксть эзда
Живоень валнят кульсь.
И ломанень и вармань
Тя вайгяльсь, мярьгат, ульсь.
И явсезне сон морась:
„Ох, калонь кунциня,
Веселай, мази цёра,
Монь эсон тят муця!
Од авань шире ольксезь
Монь серенязе кассь,
Стирнясь пяк мази улень,
Но паваз шкайсь изь макс.
И лама сельмоведьта
Мон пяярень иднякс,
И равжа калмоть тернень
Эстейне идинякс.
Од авать цёрац, фкянясь,
Наругаманц пяк кельгсь,
Обижакшнесь стирнятнень
И лама эряф нельгсь.
Иляденди весть туме
Ляй берягу ульцяв.
Волнатне савор тошкасть,
Шись яфиесь руцянц.
И кельгомдон монь ёрась!..
Но кельгомс ашезь сав,
Сон ярмакт казендсь тейне,
А мон ашине сяв.
И мяштезон монь тянкса
Сон оржа пеель тонксь,
Монь калмамань вов тяза...
