Тячи монь седистон
Синць лиихть стихне,
Тячи перазе
Танга савсь штамс,
Мяштезень кепсихть
Радостень вийхне,
Народнай учительть
Ераса шнамс.
Тя лемсь кармай кайгома
Вечна най одста,
Азсак сонь — горда
Седиезт прай.
Семьяса, школаса
Ашкотф почетса,
Тейнза кельгомась
Эздонк юрнай.
Павазу, козя
Учительсь странаса, —
Казезе тёжянь
Идняса народсь,
Перьфканза однятне
Ежияйхть, касыхть,
Кемоксни, валдомкшни
Сталинскяй родсь.
Мяляфтса, атя
Корхтась фкя тейне:
„Однятнень ёткса
Работамась — тантьф.
Сядот од эряф
Кельгозь мон тиень,
Кядьсон лисьфкятне
Нолдасть од панчфт.
Ученикозе инжикс
Сашендсь, пилот ни...
Корхтась, што лиенди
Шобдаса фкакс,
Морятнень вельфке
Ендолнякс ётни.
А ня шитнень почфась
Родинань врагть.
Кулхцондонь... эздон
Изь мянь фкявок валня.
|