Шаржу мороз-атять пингста
Панжи монь седисон май!
Аляй, од аськолксцень инкса
Кемоста палате дай!
Инголи пильгцень тон латцеть
Каршезон, кода чужой.
Тяни жа соколонь пацят
Тейне тон казеть, родной.
Музазень лажнамда кардайть,
Потмостон панить тон каньксть,
Шамастон визьксозень нардайть,
Валхтыть монь копорьстон канксть.
Тянкса спасиба тейть, аляй,
Ламняс шумбраня тон ульхть!
Штак жа тон прокс, акша паля,
Седистот шямонть и пульть.
Лятфтака, тонь нурдоняса
Велеса най ускседязь,
Шраня ваксс качам кудняса.
Конакокс тонь путнедязь.
Ашкорять баснят и ёфкскат, —
Павазть кувалма кулят,
Варжакстта перьфкат, вдь ёфси
Азонтфцень няят, кулят!
Тон богатырень семьясат, —
Павазсь ни кядьстот аф прай.
Ульхть славнай атякс жа тяса,
Строяк тон шкайфтома рай!
Велети азонкшнек баснят,
Няфтть эсост од исполитт,
Конатнень семьяса васьфнят,
Иотксост синь сирет и иттть.
Шаржу мороз-атять пингста,
Панжи монь седисон май!
Аляй, од эряфцень инкса
Стопкатнень комафтсаськ дай!
| 
