| СОВЕТСКЯЙ НАРОДТЬ ГОРДОСТЕЦ |
| А. М. Горькийнь куломанц омбоце годовщинац |
Кафта кизот тяда инголе — 1936-це кизоня июнть 18-це шистонза — кулось великай русскяй писательсь, человечествать счастьянц инкса самоотверженнай и страстнай борецсь — Алексей Максимович Горькийсь.
Троцкистко-бухаринскяй убийцатнень подлай фашистскяй шайкасна сязезе прекраснай эряфонц революциянь пламеннай буревестникть.
„Ленинонь куломодонза меле — Горькийнь куломац — инь стака юмафкссь минь странаньконди и человечествати“ — азозе Молотов ялгась гениальнай писательть паметенцты посвященнай речьсонза.
Горький йотась стака трудовой эряф, конац пяшксель невзгодта, лишенияда, жестокостьта, обидада и гоненияда, кона эряфть ланга обрекал царизмась сембе мыслящайть, передовойть, активнайть, сембонь, мезе кепсезе эсь вайгяленц насилиянь и вяронь царствать каршес, буржуазно-помещичьяй вековой гнетть каршес. Йомланястакиге Горький эсь сембе произведениянзон, сембе эсь эряфонц сотозе народть мархта, коста сон сонць лиссь. 30 кизода тяда инголе Горький сьормадсь: „Народсь — аф аньцек вий, конац тисыне сембе материальнай ценносттнень, но и единственнай и неиссякаймай источник духовнай ценносттнендинге...“
Горький эсь прекраснай произведениясонза моразе трудящай ломанть образонзон, ломанень счастьянкса самоотверженнай тюрихнень образснон. Изергиль бабать йофксонзон эзда Данкось, буревестниксь, а тяда меле Павел Власовсь, „Мать“ повестть эзда сире Ниловнась и лама лия пролетариятнень, революционерхнень замечательнай образсна пяк известнайхть сембе советскяй народти.
Великай пролетарскяй писательсь эсь статьянзон и художественнай произведениянзон эса гневна разоблачандакшнезень народонь вракнень, революциянь вракнень. Сон непревзойденнай мастерстваса рисовандакшнезень йотай пингонь ломанень типнень, ломаттнень—хищникнень. Эсь романонзон эзда фкяса „Клим Самгинть эряфоц“ Горький няфтезе капитализмань холопонь типть, двурушникнень и предательхнень типснон. Тя отвратительнай ломанень кондяма типса, можна няймс тянийнь пингонь фашистскяй наймиттнень и родинань предательхнень характернай чертаснон.
Горький лац содальхце вракть и меткайста шавсь эсонза. И вракне шарьхкоделезь, кодама страшнай тейст Горькийсь.
