Вай, шитне ётнесть,
Етнесть недлятне,
Недлятнень мельгя
Етнесть кизотне.
Етнихть кизотне —
Эряфсь полафни,
Лиякс эряма
Народсь тонафни.
Коса вирьхть улендьсть,
Тоса паксят ни,
Лангаст сёротне
Пряснон комафнихть.
Тяфта Алдутькя
Эряфкац полафтсь —
Емла стирьняста
Оцю стирькс арась:
Мази келунякс
Петевсь ронгоняц,
Алянь сельме вий
Салсесь мяштеняц;
Крфазня крфась
Соньня шаманяц,
Парцинь сюренякс
Цифтордсь шяярьняц.
Касомань шовор
Полафтсь прявицка,
Пингень юкснькшневсь
Кулоф тяряцка.
Ся кизотнень сась
Кельме Сибирьста
Анна аканяц,
Радной сазорняц.
Кинди азови
Кеняндемасна,
Кинди морави
Радовамасна!
Корхтайхть, аварьдихть,
Рахсихть-пеедихть,
Кеняндезь, ялгат,
Месть аф тиендихть!..
Сяка шинятнень
Весялгодсь Алдусь,
Лия кинява
Эряманяц тусь.
„Вай, цебярь Алдусь,
Серецка сери,
Содаф, козянди
Урьвянякс моли“. —
Тяфта корхнекшнесть,
Аньцек эсть сода
Соньня ёнензон,
Потма думонзон.
Зря кизефнезь
Козя кудатне,
Велень азорхне,
Велень потяйхне.
— Тядде аф туян,
— Мес, ши валдоняй?
Кенерян нинге,
Пара щаканяй.
— Мяньцак вастонять,
Сяльде пеняндат...
Азк ляды валцень
Тяддя аф туят?
— Аф, аф, щаканяй, —
Корхтай Алдунясь,
И лиси кудста
Тевень якайнясь.
Кяжсна сашенкшнесть
Ляй велень стирьхнень,
Мес паньцесыне
Алдусь кудатнень;
Нльня ладсекшнесть
Морот ланганза,
Ульцяв яксекшни
Соньцень ялганза:
„Алдунясь цебярь,
Алдунясь мазы,
Рьвянякс арай —
Казьнет аф кази“.
