Пялдезь шары сувхнень фталга
Олаф шама уи ковсь,
Ризфса валы ризфу валда,
Ризфу кужес валдоц повсь.
Скучнай киньке ловса ацаф,
Борзай тройкась ардозь мольсь;
Горяй пайгенясь фкя лаца
Мялень мольфтезь жольдердьсь жольф...
Кати-мезь родной мон марян
Пефтем морстонза ямщикть.
То сон вольнай эряф морай,
То мянь сединь пичефкс шить.
Аяш кудт, аф няян толга...
Шава пакся, лов и — ве...
Аньцек потайхть сёрмав столбакс
Кинькень вакска вайгяльбет.
Лажадфсь эсон, ризфса палан...
Ванды, Нина, куду сазь,
Пси каминть ваксс эжмя аран,
Лангозт ванан, прянь юкстазь
Частонь стрелкась кайгезь шашты,
Пинкнень меразь, эсь кинц пес;
Скучендаманекень маштомс
Минь аф явфты пяля весь.
Скучна, Нина, скучнай кизе,
Нувфсь ни моронц нельгсь ямшикть,
Жольняй пайгеняське сизесь,
Сувса вельхтяф ковонь ликсь.
