| 90 | Андрей Чекашкин |
— Монь, ялгат, аф сай верондамазе Юргинтти, думандан, што сон корхтась аф эсь валонзон Сидеста симоньчи винада, минь хуть аф весть сонь карнеськ, иредста ломаньць курок может повомс классовай вракть кядь-алонза. Мон йоткстононт сембодень абижафсян. Алашат минь танга раматама, ниньге сяда цебярьхть, а брадозе монь Митясь аф рамеви, ито нят цьоратнень виноватокс аф чадондасайня*. Мон кирьдине синь ширеснон синь комсомолу прьмамстот, надиянь, што синь ниньге сяда лац кармайхть работама и виде сембе тефнень, конат путнефт синь лангозот, тиеньдезь ребярьста*. Юргинть валонзонды аф верондама, а кизефкссь кадома панжада. Терьттяма шичас милиция, тихтяма пялост обыкс*. Ну, курок азомс, максомс эряви тевсь следствияс, а тяникиге цьоратнень ланкс тяда кяжиякшне.
Филясь яфодезень фталу шяярензон и озась вастозонза. Пуромкссь жалназевсь, кажнай колхозниксь азсь эсь мяленц ударникнень колга, но жалфса мезевок ашезь шарьхкодев, а кулевсть аньцек башка валхт и нюрьхкяня предложеният: „Цьоратьне тянь аф тисазь!“, „Юргинць аф васькафни!“ „Судс максомат!“ „Ускиентть кудынгели!“, „Ляпфцайнек бокснон“.
Микитась илештьф кядьса нежедсь матьса сотозь Васять и Александрть малас, фатязень мяштте и ушедсь ускома эсост наротть йоткс. Фтала марявсть вайгяльхть: „Ускить се! Сямольде катк милиционерхне сявсазь“.
Зойновсь лоткась цингорфтомда пайгонять, лиссь шрать ваксста и аерфтозе Микитать цьоратнень эзда.
— Судс максыментть, а шавомс аф макссайнек цьоратнень.
Пуромкссь лоткась шумнамда. Зойнов ялгать и комсомолонь ячейкать секретаренц Филять корхтамаснон коряс лихць путфкс: „Правлениять кизакувалмонь работац лувомс цебярьста. Эряви кярьмодемс эрь колхозникть бытовой эряфонц мельге ванома, эняльдес комсомолонь ячейкать секретаренцты сяда пяк вишкоптемс культурнай работать. Тевть алашань саламать колга максомс следствияс“.
Колхозникне ушедсть срадома кудга.
Шовдаль ни. Сидеста валдомкшнесть вальмасна. Пакшень-пакш ляцсь валдсь ульцять туркс вальмятнень эзда. Валда пакшнень эса няевсь туманць серай качамкс, сон ащесь аньцяй афлувомшка пульнятьнень эзда, конат пихцть кожфса. Кигя молихне йотнесть валтть эзга и имсесть шовдати
Сыргозсть велеса пинетне пуромксста сайхнень корхтама вайгяльснонды и пильгень тупфснонды, синь увасть молихнень ланкс, мархтост кавкснесть и йомла пинелефксятьневок.
V
— Нака! Тязк пилененьге идьце пандозень. Кати месендят тоса снярс?! — цяткафнесь кяжиста Фокась ирьванц ланкс, конац тольки сась эшиланкста и нинге ашезь кенерь ведь ведарканц путомска.
— Эрь сяшкава тят цяткофне лангозон, тяни пачк штоли тейне сязевома? Шичас сявса, аньцек лямозень пяшкодян — корхтась Фокарясь, цюгунста капстатнень и модамарьхнень ланкс ведень каямста. — Эх, осподикай, мзярда шта ломаттнень лаца вай лямдя ярхцтама. Лофцоня, вднать, сельмесотка аф няят. Мярьгень колхозу суватама, тостонга кати мес ушедсть лисема. Тон кулеть мезевок? — кизефтезе мирьденц кядьстонза шабать сявома йоткова. Шабать кядьсоль исяконь пидеф модамарь, конань шуроста аварьдема йоткова тонгондозе елма кургонязонза.
— Мезевок ашень куль. А мезе? Азонтка! — Фокась ванць кургонь келептезь урьванц ланкс. Сон стясь галанкать ваксстонь эземста, озась лазонтф ташта шрать ваксс и учсь апак каштордт, мезе кармай азондома урьвац.
— Микитарясь азондозе эши ланкса, — корхтась Фокарясь. Юргинц*, няйсак, йотай илять марстонь пуромксса ворхнень-ломаньшавихнень азсь кит. Ветькиге сянь кувалма тердсть милиционер и тисть обыск...
— А кинь, кинь азсь?!
— Вай д штоли сяньге ашить сода? Иван атянь и Петя-атянь цьораснон. Обыскта меле ветькигя милиционерхне нилицькень алят-церат сявозь пякстамс.
