Сргозсь рана, кода и лацсесть, но сявозень калонь кунцеманзон и тусь Васькать стяфтома. Но аньцек кенерс воратанява лисема, няезя Серёжкать.
Ашель кодамова сомнения тяса, што Серёжкась молсь ляйть шири нерятанятьнень ванондома. Исця сода, што Петькась мельганза ванонды, сон молсь перетьнень вакска киняти, мольмоста ашкорясы пикскять кшнинь кячказть эзда. Петькась мрдась калдазу ёрдазонь масторты калонь кунцеманзон и тусь ласькома Серёжкать меля, конац кяшевсь-ни кальхнень потмос.
Серёжкась молсь, весяласта вяшконць эсь тийф шуфтонь вяшкомса. И тя улсь Петькати кядь лад, сяс мес сон тяни кармай мольма сяда ичкизя Серёжкать эзда, аф пичеди, што няйсы и шавсы.
Шудавась улсь мани, гомонливай. Везде лопачнесть почкатьня. Модать алда сидеста лисенць нарсь. Марявсь расань келу соконь шиня, и тюжя панжи ивань лангса дружнаста быйнясть лисфь дабычань вешенди мешня.
Сянькса, што шудавась улсь тяфтама цебярь, и сянкса, што сон тяфта удачнайста ванозя Серёжкать Петькати улсь весяла, и сон тёждяста и аф пелезь молсь кичкора тяйня кинява.
Тафта ётась пяля частшка, и синь пачкочнесть ся вастти, коса Тихай ляйсь, тиенди крута шаркстома, тушенць овракненди.
«Ичкизи яци... хитрайсь», думондай Петькась, ненгя инголя кенянчни эсь пачканза сянь колга, кода, сацазь «кячказть», ласькийхть синь Васькать мархта ляйть шири, кундасазь и эсь, и Серёжкать нерятаняснон ёрдасазь синь тяфтама васц, коста Серёжкась век аф мусыень.
Шуфтонь вяшкомть морамац кати мес лоткась. Петькась тусь сяда вишкста молма. Ётась аф лама минута — танга аф кулеви мезева.
Эста, пичедезь, и аф жалнязь, сон тусь ласькозь, пачкоць шарксть тейс, лифтезя кальхнень фталда прянц. Серёжкась тоса ашель.
Тяса ляць мялезонза Петькать, што аф ламода инголя бокс молсь аф оцю киня, конац молсь ся вастти, коса Филькать шюдерьксоц пракшнесь Тихай ляйти. Сон мрдась шюдерксть устьяс, но тосонга ашель Серёжкась.
Наругасы эсь прянц ротозействанкса и недоумениянкса, ков
30
