Page:'E guarattelle.djvu/19

From Wikisource
Jump to navigation Jump to search
There was a problem when proofreading this page.
— 19 —

Carm. — (accarezzandola) Tu te l’haie ’a piglia! Si no, comme staie bbona?

d. Vic. — Ne vuò nu cucchiarino? Iammo... pigliatella...

Giul. — È amara...

Carm. — (prende la bottiglia e versa in un cucchiaio un po’ di quel liquido) Iammo... sùsete...

Giul. — È amara...

d. Vic. — (le mostra un soldo) Iammo! Si t’ ’a piglie, te do nu soldo...

Giul. — (con gioia) M’ ’a piglio... m’’a piglio...

Carm. — (dopo averle dato la medela) Bravo!... Pare na santa...

d. Vic. — (dandole il soldo) E chisto è ’o soldo...

Carm. — (a suo marito) E tu nun vaie a’ suggità?

d. Vic. — Che buò! M’ha fatto tanta mpressione sta guagliona, ca me sento ’o core niro niro... Ma me n’aggia i’ pe fforza... Stasera s’ha da vutà ’o presidente...

Carm. — E si te fanno presirente?

d. Vic. — (ridendo) Eh, me facevano presirente!

Carm. — Pecchè, nun po essere?

d. Vic. — Io me ne vaco... Addio, Giuliè. (Giulietta lo saluta con la mano).

Carm. — Retirate ampresso... Io resto n’ato ppoco pe lle fa cumpagnia.. (don Vicienzo esce, chiudendo dietro sè l’invetriata) S’è fatto scuro... Vulimmo appiccia ’o lume?

Giul. — Ncopp’ ’o cumò nce sta ’a lampa.. (Carmela ravviva la lampada innanzi la Madonna).

Carm. — Tiene appetito?

Giul. — Si...

Carm. — E che vuò? Di’...

Giul. — Nun pozzo tuccà niente. ’O miedeco nun vo’...(lungo silenzio). Donna Carmè, me vulite cuntà ’o cunto d’ ’auciello grifone?

Carm. — N’ata vota ’o vuò sentere?

Giul. — Si, sì... me piace ’e sentere.

Carm. — E te staie zitta?

Giul. — (ponendosi la mano al petto) A parola mia!