Page:'E Lluce-luce.djvu/245

From Wikisource
Jump to navigation Jump to search
This page has been proofread.


MAMME NAPULITANE


Mamme? Tutte so’ mamme. ’Na mamma ca pe’ niente
se schianta, apprennetiva; n’ata ch’è ’ndifferente,
ca si ’nu figlio cade, fa: «Te l’hê rotte ’e ggamme?»
’San Viciè, famme a’ grazia! Fall’j’ sott’ ’a ’nu tramme!»
E n’ata ch’è chiù plàceta, carma, ca nun se smove,
ca tene diece figlie; ma si nne conta nove,
’a sera dint’ ’o vascio, nu’ strilla, nun suspira,
ma lassa ’a porta aperta, «si ’ncaso se ritira»
N’ata, ca ne tene uno sulo, uno sulo, ’e tre
quatt’anne... e ’o perde sempe; e strilla: «Puppunieèè»
E n’ata c’a ’nu figlio l’attenta ogne minuto:
tremula si cuciulèa, si fa quacche sternuto
cerca cunziglie a ’o miedico, zompa add’ ’o spezziale,
l’abbotta d’uoglio ’e riceno e d’acqua turriacale...