Page:'E Lluce-luce.djvu/24

From Wikisource
Jump to navigation Jump to search
This page has been proofread.
22
Poesie



'E PPALUMMELLE


L'aggiu scritta 'na lettera
c' 'o core 'nmano e 'nce l'aggiu mannata,
aspettanno 'a rimpetto. — Pe' dispietto,
s'è affacciata a 'o barcone e ll'ha stracciata!
E l'ha menata abbascio. 'E ccartuscelle...
se so' spannute all'aria...
comme fossero state palummelle...
E una 'o viento a me — me l'ha purtata,
e m'ha pusata — 'mpietto...
'Mpietto!... ncopp' 'o gilè. — Vicino a 'o core...
L'aggiu pigliata e me l'aggiu liggiuta.
'Nce stava scritto: «Amore...»
Parola disprezzata!
Parola scanusciuta!...
E si' turnata — a dò si' asciuta!...