Page:'E Lluce-luce.djvu/138

From Wikisource
Jump to navigation Jump to search
This page has been proofread.
136
Poesie


SFIZZIO

E ca i’ te dico: « Vattenne! »
Niente! manco te ne vaie!
Ma c’aspiette? Che pretienne?
Ca mme turmiente... che faie?

Mamma, che se ne rentenne,
dice: « Figlio! Tu nun saie?
Chesta c’ ’o bene te venne
è fáveza quanto maie! »

— « Ma i’ nun lle dongo denare.
Vo’ a me... vo’ a me sulamente!
— « E chesto poco te pare?

Ma comme? Nun l’hê capita?
Figlio! ’E denare so’ niente,
si tu ce ’o ppave c’ ’a vita! »