Page:'A storia nova - Ferdinando Russo.djvu/36

From Wikisource
Jump to navigation Jump to search
This page has been proofread.


VI.


... È notte. Mmiezo ’e ppalme nere nere,
na luna rossa fa na macchia ’e sanco.
Sè combattuto pe diece ore, ajere,
e s’è vinciuto! Ma ’o suldato è stanco...
Sta ’nsentinella, a fora d’ ’e ttrincere,
e penza ’a mamma. Ah, nu capillo janco
d’ ’a vicchiarella, quanto ’o pagarrìa!
E canta: « Oi suonno caro ’e mamma mia! »

VII.


Tutto è silenzio attuorno, e dorme 'o viento
Dòrmeno ’e ffronne, e nun se sente n’a...
Ma chi striscia pe terra a tradimento?
Chi cerca, zitto zitto, ’e s’accusta?...
Ah, mamma santa! Scanze stu mumento!
Figlieto canta... penza a te... sta llà...
E nun vede, e nun sente e nun s’addona...
Dio beneditto!... Mannancella bona!...


— 32 —