Page:'A storia nova - Ferdinando Russo.djvu/26

From Wikisource
Jump to navigation Jump to search
This page has been proofread.


VI.


Passa?! E mo’ vide si s’ ’a passa bona!
Ah! Figlie ’e cane!... Piglia ’a carabbina!
Me pare ancora ’e sentere ’a canzona
ca m’addurmeva, cu mammà vicina:
— All’arme! All’arme! La campana sona!
Li Turche so’ arrivate a la Marina!

Chi m’ ’oddiceva, ca sti nnonna-nonne
s’avveràvano overo, ’a fora ’e suonne?!

VII.


Chi m’ ’oddiceva a me, — quanno guaglione
disignavo cu ’o gesso ’e pupazzielle
e p’ ogne pizzo ’e strata, ogne puntone
mmiez’a na folla allegra ’e cumpagnielle
screvevo sott’ a uno: « Il Gran Milone »
e sott’ ’e Turche: « So’ ’e mmulignanelle »
ca, fatto gruosso, overo ’a vedarrìa,
sta guerra santa pe l’Italia mia?!

— 22 —