Page:'A storia nova - Ferdinando Russo.djvu/24

From Wikisource
Jump to navigation Jump to search
This page has been validated.


II.


Pigliatevillo! Non sarrà na rosa,
nun sarrà no carofano schiavone,
non sarrà na camèlia prezziosa,
ma sarrà sempre chino ’e spressione!
È comm’ ’a Musa mia: Musa scornosa
ca s’annasconne senza cante e suone,
ma sente ’npietto fuoco ’e vero ammore:
si è brutta ’e faccia tene bello ’o core….

III.


Accompagna ’e soldate, tale e quale
comm’ ’e scugnizze appriesso ’e reggimente,
nnanz’ ’a fanfarra, attuorno ’e capurale,
facenno capriole a ciente a ciente…
Lloro, pe ncopp’ 'o Campo e p’ ’e Casale,
io, nfino a mmiezo ’e Turche, ore e mumente,
e veco ’e frate miei ca fanno ’a guerra
e ’a Mezaluna scarpesata nterra!


— 20 —