Page:'A morte.djvu/12

From Wikisource
Jump to navigation Jump to search
This page has been validated.
— 10 —

D. Sofia. N’ato poco, e t’’a spuse... e c’ ’o sanghe mio, c’ ’o sudore d’ ’e fatiche meie...

Crescenzo. Sufì, penza a sta’ bona! Che vaie mettenno mmiezo, mo! Mmece ’e te mettere ’ngrazia e Dio, ca te l’ha ditto pure ’o cunfessore.

D. Sofia. (con terrore). ’O cunfessore?! ’O cunfessore... è overo, chesto m’ha ditto: — Sufì, figlia benedetta, miettete ’ngrazia ’e Dio, na vota pe sempe... E ave ragione... Giesù Cristo pecchesto mm’ha fatto arreducere accussì... e po’ se n’è scurdato!...

Crescenzo. Vattenne, ca Dio nun abbandona a nisciuno... e specialmente a chi se pente... Fa chello che t’ha ditto ’o cunfessore, e nun te n’incarricà.

D. Sofia. E chesto farraggio. Aggio mannato già a chiammà pe Franceschella na bona purzione ’e gente, p’ ’e pave che tengo dispenzate, e l’aggio mannato a di’ ca nun voglio manco na cientesemo ’e ’nteresse... Mme voglio ritirà sulo ’o capitale, e niente cchiù. Faccio buono?

Crescenzo. Buono.

D. Sofia. (addita il comò) Tira ’o primmo teraturo d’ ’o cumò: llà ce stanno sei fazzulette ’e seta, e sei scialletielle ’e lana; pigliatille e vide d’ ’e vennere pe chello ca mme costano... cinche lire l’uno e... ammeno accussì scacciammo ’a tentazione..

Crescenzo. Va buò: po’ se ne parla ’e chesto.

D. Sofia. No: primm’ ’e mo... Tu nun saie nuiate mercantesse che passione tenimmo pe stu mestiere... Simmo tentate ogne minuto sicondo...