O tondo de Natale

From Wikisource
Jump to navigation Jump to search
O tondo de Natale
by Nicolla Baçigalô
da-o scito do Comun de Zena

[...]

21
Töa missa in moddo splendido,
O da poei fâ do sciäto,
E tanto ciù ne-o popolo,
Ciù do so pròprio stato,
Quanto a-o menû, o l'é d’òbbligo,
No gh'é raxon, ne scûsa;
Coscì va fæto e s’ûsa,
Pe antiga tradizion.

22
Minestra: o natalizio
Tipico maccaron,
Chêutto c’ûn pö de sellao,
Ne-o bròddo de cappon.
Questo o l'é de prammatica,
No sæ manco Natale,
Se ûnn-a minestra uguale
A fosse eliminâ.

23
Natûralmente, seguita
Questo cappon buggïo,
Ma chêutto in punto e virgola
Ne fatto ne savoïo,
O quæ, o deve ëse tenio,
Co-a pelle bella gianca,
Che o pëto, a chêuscia e l’anca
No saccian de pollâ.

24
Poi ven ûn piatto d’ûmido:
Cioè, fracassâ de creste,
De colli, chêu, pellantega,
Pevë, fighæti e teste
De pollo, con lûganega,
Che l’aggie so bagnetta
Pe poei bagnâ a maoletta
Con di crostin de pan;

25
Un atro piatto d’obbligo
O saeiva l’aragosta
Pe quelli che pêuan spendighe
Tûtti i dinæ che a costa;
Ma anchêu no se tia a læxina,
Voei a ghe vêu, n’importa
Che a seggie chêutta morta,
Per quelli che nö san.

26
Poi, ven l’indispensabile
Berödo e tûtt’intorno,
di tòcchi de lûganega
Pe scòrta e pe contorno
Unico a-o palato e satûro
De pessi de çervella
De fietti de vitella,
Festecchi e de pignêu ;

27
O ròsto indispensabile
Pei ricchi e i fradellin
O l'é, besêugna dïvelo?
O classico bibbin;
Se a l'é bibinn-a zovena
A molti a pâ ciù bonn-a
Mettendola ä storionn-a,
Ma a regola a no vêu.

28
Un atro piatto indigeno:
Radicce pe insalatta,
Che o tròppo grasso o mitiga
E a-o stêumago o s’addatta,
Tenie, che perdan l’anima,
C’ûn gûsto d’amaretto,
Tant’êuio, ûn pö d’aggetto
E quæxi senza axiôu.

29
O dôçe o l'é ad libitum;
Torte de pasta fròlla,
Læte de tûtte e specie,
A ròsto ed ä spagnòlla,
Croccante con l’amàndoa,
Meringhe, cobelletti,
Pasta sfêuggiâ, bonetti
De læte e zabaion.

30
Secondo i gûsti; a regola
Esplicita, formale,
A vêu o caratteristico
Pan dôçe de Natale,
De forme mastodontiche
Perché o soddisfe l’oeûggio,
Co-a ramma de l’öfêuggio
Ciantâ in sce-a sommitæ.

31
A questo no se deroga,
E o Cappo de famiggia,
Pe sacro ed inviolabile
Sò privilegio, o piggia
L’arma do sacrifizio,
E sûbito o se mette
A fâne tante fette,
Con tûtta serietæ.

32
Pan dôçe dunque, amàndoe,
Festecchi, cannellette,
Frûta candïa, damàschine,
Nèspoe, çetroin, sëxette,
Uga, zebibbo, dattai,
Amàndoe, fighe secche,
Mostarda, noxe becche,
Vegette, mandarin,

33
Torron, frûta in to spirito,
Peie bûrê e martinn-e,
Mei carli, meie rûzzene,
E meie canellinn-e,
Beschêutti d’ògni genere,
Rechêutto de Voltaggio
E in ûltimo, o formaggio
Ch'o deve ëse Stracchin.

34
E questa miscellanea,
A forma o materiale,
Secondo l’ûso classico,
Do tôndo de Natale,
Che i figgi, i nevi, i zenei
E tûtta a compagnia,
Se devan portâ via,
Secondo a tradizion.

35
Se særa cö Rosolio
E o dôçe d’Alicante,
O vin dell’Arçipelago
E l’Asti spumeggiante;
E quarched’ûn, all’ûltimo,
O termina a demôa,
Con fâ portâ in sce-a töa
E beive a-o bottigion.

[...]