O Cicciollâ 1930/A mosca

From Wikisource
Jump to navigation Jump to search
O Cicciollâ by Feipo Noberasco
A mosca
[ 115 ]
A MOSCA

Gh’è tanti che no conoscian sò poae e ciù tanti ancon che n’han mai visto ûn bigetto da mille, ma tûtti a rëo conoscian ûnn-a brûtôa: a mosca. A conoscian tûtti: grendi e piccin, maiae e fantinaeghi, bestie e cristien. A conoscian tûtti, perchè o mestê de que l’angosciosa o l’è quello de rompî o chitarrin a tûtto o mondo ciù ûn caroggio.

Ho sentïo de votte distingue tra-a mascarsonaia da prüxa de cristlan e quella de can e no se saiva quae a fuisse pezo. Ma a mosca, mae cäi, a l'è paigia pe tûtti. Sta sciarbella a rappresenta l’uguaglianza e dieiva, anzi, o socialismo.

A l’è ciù finn-a che a vorpe: a l’ha di êuggi che sgarban: a vedde tûtto: dai cobelletti do speziâ, ai tosci da rûmenta. A vedde tûtto e, da bestia gorfonn-a, a s’attacca a tûtto. Pe le a saiva intoescegâ da pettelëa a va tanto comme a cremma de ûnn-a meringa.

E testarda, sei, quella bestiazza! Pe mi a l’è o veo campion do carattere. A mandae a quello paise a scciaffi, a pattoin, a mandillae: ghe tiae zù ûn vocabolaio de giastemme. Stae freschi! Con ûnn-a costanza da galêa a ve ritorna çinquanta votte in to maeximo lêugo. Ghe l’ei testa?

Pe-a mosca o no gh’è segreti: a trovae dappertûtto comme l’äia, comme i tacca pomelli. E dovunque a vagghe quella scorlûssoa, a fa conto d'ëse in cà sô. Stae segûi: no troviei ûnn-a faccia onesta e manco ûn panno de cicciollo, ma troviei sempre quella bestia. [ 116 ] E se no-o sei, ve-o diggo mi. A mosca a l’ha faeto di stûdi speciali pe fâve scciûppâ dä raggia. A ve sûssa i êuggi, a ve gatiggia o naso, a v’intra in letto, in ta camixa, a ve mesûa o coppûsso e a-o fa con ûnn-a flemma coscì pelandronn-a, che o pâ che a se segge missa d’accordo cö vostro pezo nemigo pe fâve sorizzâ da-o venin.

Ma de votte a so sfacciataggine a tocca o colmo e a v’intra in bocca. Cose fiesci? O lasciâla passeggiâ, o collâla zù comme ûnn-a ciappelletta. Se doi galanti discoran cädi, se ûnn-a monega a l’è in contemplazion, se ûn scolaio o l’è lì che o ven matto con Ciceron o cö teorema de l’aze, stae segûi che a mosca a no tarda. Vediei. A l’ha ûnn’anima infernale, mi diae, anzi, ch’a l’è o diao sotto forma de mosca. Piggiae Dante e veddiei che no conto de micce.

E in te sta pascion de infricciâse in te tûtti i garbi, de angosciâ tûtti e tûtto, a mosca a trêuva spesso o giorno estremo da so vitta. O cristian o se rompe o collo, o creppa d’ûn aççidente o magari d’indigestion de boridda o minestron. Non coscì a mosca. Le a se nega in ti macaroin co-e trippe, a finisce in to pin de raviêu o a resta sotterâ in to sambaion. Che morte magnifica restâ secchi in to sambaion! Manco Augûsto o l’è morto coscì. E ben, vedei; anche moïndo, a mosca, a ve fa l’urtimo despëto. A mangiesci ûnn-a fricassâ co-e mosche?

Beneite e galinn-e e i bibbin! Lö fan presto. Ghe capita ûnn-a mosca? A cominsa a fâ o streppin? Unn-a pittâ e tûtto o l’é finïo. Oh! se anche i orami poessan ciappâ quelle bestiazze e mangiâsele! O saiva ûn doppio benefizio: ûn aggiûtto pe l’igiene e avei a man ûn alimento co no costa ninte. Ve pâ poco? Ma in ta mosca o ghe saiva a soluzion da question sociale! Gh’aviesci mai pensôu?