Novèles à n’nin mète è totes lès mwins

From Wikisource
Jump to navigation Jump to search

Li twa (Li torê) dèl cinse Béli.

2010


Il a faît pèsant, lourd, crau, tote li djoûrnéye. Djè l’a passé a r’ssouwer m’ coyène avou m’ mouchwè d’ potche. Adon, quand dj’a trèvautchî l’ pont su l’ richot, dji n’ m’a pus soyu rasténre. Dj’ a taurdjî su l’ costé dès fis d’arca. Dj’a sautelé lès filochés dèl pâture. Lès bièsses pachîn’ byin lon su lès d’zeûs. On éron plâneûve al cache po mougnî èt dji pleûve veûy li clotchî do viladje qui dispasseûve au d’zeû dès tièsses dès saûs. Dj’a rademint asplâné tot l’ long d’ l’âye di nwêrès spines jusqu’al trawéye èwou qui dj’ vins co bin pèchî. Dji m’a disbiyî mièrnu èt dj’a plonké fin rwèd dins l’êwe ! Mi cwârps s’a rapaîri ossi rade. Dji m’a mètu su m’ dos èt m’ lêyi pwârter. Dji m’a bagnî dins l’ frisse êwe. Dj’a r’monté l’ courant al brasse po ratraper mès moussemints. C’èst la qu’ djè l’a vèyu pèstèler mi tchmîje èt m’ culote avous sès gros chabots. Dji pinseûve qui c’èsteût on boû, mins, quand dj’a vèyu lès deûs grossès clokes di pauques qui pindîn’ yinte sès pattes di d’drî, dji m’a sintu pièrdu. I d’veûve bin fé mile kilos su pîds. On monsse ! Èt r’mouwant come pas deûs ! Nin on « Bleû-Blanc-Bèlje » qui osse di crauche èt qui n’ sét pus ope. Astoke à lî, lès twas qu’ dj’aveû d’djà vèyu è l’Èspagne richonîn’ à dès djon.nes vias. Sès trôs d’ nasia : dès vraîs soflèts d’ fwadje. Dès cwanes au laudje come dès brès d’ luteû d’ fwêre. Quand i m’a vèyu, il a èdaumé à cheûre si tièsse bèrlic-bèrloc…

Tot bagnant, dj’a r’monter d’on dîjin.ne di mètes. Dj’a apicî one coche qui pindeûve au d’zeû d’ lêwe. Tot doucètemint dj’a sâyî do r’monter su l’ bwârd. A pids d’ tchau, mès-artias ridîn’ dins l’aurzîye. Dj’a satchî on fèl côp su l’ brantche, zoupeler, tot mi r’tournant, po m’ ritrover achide dins lès yèbes sur one flate, bin crausse, come pus laudje qui mès deûs fèsses. I-gn-aveût cop cinq mètes à fé po p’lu ramasser m’ culote avou mès clés po l’auto. I s’a mètu à pèstèler. A grèter têre avou sès pates di d’vant. Lès brous èt lès claves qu’i-gn-aveût véla montîn’ è l’aîr èt r’tchaîr jusqu’a su si scrène laudje come one tauve. Tant qu’a fé, m’ culote a sû l’ minme vôye po s’ ritrover pindouwe dins lès bouchnis’. Il a bachî s’ tièsse, fé chonance do v’lu plonker sur mi. Waîte todi d’ t’arindjî avou one parèye bièsse, mi dj’ènn’aveû l’ pèpète. Dj’a r’moussî d’èwou dj’avo v’nu : dins l’ êwe. Dj’a sâyî d’ ratraper m’ tièsse èt cachî comint fé po m’ rissatchî fou di ç’t-èburtakante istwêre la. Dji n’ sé poqwè, mins dj’a sondjî al politicayerîye qui laît pourî dès samin.nes au lon lès d’mandes dès bouteûs. Dji n’aveû pus qu’a lapoter dins l’êwe tot ratindant qu’one vatche divègne torlaude…

I n’ s’a nin continté d’ ça, il a ratindu, tigneûsemint ratindu. I s’amuseût avou mi tchmîje à l’ fé valser avou sès cwanes. Dji n’aveû pupont d’ôte tchwès qui prinde mi coradje à deûs mwins po sâyî d’aler r’qwêre mi culote qui pindeût dins l’ tâye. Dj’a apicî on bordon qui floteût. Dji m’a avancî l’ pus près possube po-z-awè pîds. Dj’a flâyî lès-êwes a côps d’ baston. Dj’a bwârlé, ianlé come on baudèt, gninwî, bawî, winkelé, cwakelé, beûlé po fé come lî, tot tapant mès brès au laudje. Dj’a lancî l’ bordon après s’ tièsse. Il a r’tchaî su sès cwanes sins qu’i n’ moufetéye d’on randon. Li brune tchaîyeûve. Dji c’minceûve a-z-awè l’ tchau d’ pôye. Dji n’areû pus soyu d’morer dins l’èwe. Èt tot d’on côp, v’la qu’i plonke à m’ cu. Dji n’a jamaîs batu dès brès ossi rade. Dj’a findu l’ richot come Tarzan èl fieûve po-z-aler r’trover s’ Jane. Èt dj’a pèté èvôye au pus rwèd sins mi r’toûrner. Dj’aveû d’dja bin bagni cinquante mètes quand dj’a r’monté m’ tièsse foû d’ l’êwe. I m’ rawaîteûve à gougne ; l’aîr di m’ dîre : « Ni vins pus jamaîs toûrner autou d’ mès-aumâyes… »

Dji tanfeleû come one bièsse qu’on-z-areût yu achoré. Tot-autou d’ mi, lès deûs bwârds s’avîn’ rissèrés, èt ci n’èsteût pus qu’ bouchnis’ èt ôrtîyes. Dj’a agnî su mès lèpes. I faleût trèvautchî, moussî dins lès maraches èt lès ronchis’ sins m’ sipaurgnî po qu’ ça fuche li pus coût possube. Lès spines cwachîn’ è m’ dos. Lès-ortîyes brûlîn’ lès cwachures. I gn-aveût pus on centimète su m’ pia qu’i-gn-aveût one cloquète. Yute di ç’ bokèt la, li richot rid’vineûve paujêre avou dès pachis d’ chaque costé. Dj’a bin rawaîtî s’i-gn-aveût pont d’ bièsse didins : on n’ m’i r’prindreût pus. Dji m’a cochôyu, stauré dins lès frissès yèbes, come on tchin qui trin.ne si gorléye dins lès brous. Dj’aveû télemint mau, télemint chôpe tote mi scwasse qui dj’ènn’ aveû l’ rôguia. Adon, dji m’a rapaujî pate à pate. Lès prumèrès s’twèles s’alumin’ dins li stwèlî. Ci biaté la m’a rindu coradje. I m’è faureût po roter di kilomètes à pîds d’ tchau, mièrnus, à d’ triviès lès tchamps. Dj’a co profité one apéye, stindu dins lès frissès yèbes, èt ope èvôye…

Dj’a rademint r’tchaî su l’ vôye do vilade. Dj’aveû a pin.ne roté on kilomète qui dj’a ètindu l’ brut d’one auto qu’ariveût di d’ pa padri. Dji n’ sé nin si c’èsteut pace qui dj’èsteû odé, todi è-st-i qu’al place do m’ dârer su l’ costé po m’ catchî, dji m’a r’trové l’ pôce è l’aîr. Tot paf, do veûy on’ ome mièrnu, couru lès vôyes, li tchaufeû a d’nalé sur l’ costé, frin.ner à mwârt po s’ ritrover taurdjant, au d’ triviérs dèl vôye. C’èsteût nosse curé !

« Maria todi ! Qwè avoz faît ? »

« One pitite bisbrouye avou on twa. »

Dji m’a achid al place do mwârt èt r’chôpî mès-ouys. Li curé a apicî s’ sacoche qu’èsteût su l’ banquète di d’ pa padri èt mè l’ doner. Djè l’a mètu su m’ choû po catchî mès bijoûs d’ famile. Dj’a co ossi dèl tièsse po fé comprinde à nosse doyén qu’i m’ ramin.ne al maujone. Quand dj’a rabroké dins l’ grande place, mi comére èt lès-èfants achèvin’ leû diner. I s’ont astampés rwèd bauyauds come dès postûres di pîre.

« Faut nin vos s’barer, i-gn-a nin à braîre. Ça na rin à veûy avou one istwêre di cougnadje, co mwins avou on’ ome djalous. »… Nosse doyén n’ m’a nin prétchî al pirlotche, mins li lèddimwin tot l’ viladje à rademint soyu qu’i-gn-aveût yu on sbaré qui coureût lès vôyes do viladje tot mièrnu.

Al vièspréye, li cinsî Béli m’a rapwârté lès fligotes di mès loques. Lès clés èstin’ todi dins l’ potche di m’ culote. I m’a dit qui s’ twa pacheût paujêremint !


CC SomeRightsReserved.png
Cc-by white.svgCc-sa white.svg
This work is licensed under the Creative Commons Attribution-ShareAlike 3.0 Unported license.