Ms. Marston 56/De lo sermon e de la lezenda de messê sam Lorensso martiro

From Wikisource
Jump to navigation Jump to search
Manoscrito Marston 56, 1465
De lo sermon e de la lezenda de messê sam Lorensso martiro
azonto maiuscole, pontezatua, tratin inte forme interrogative e diacrittichi (segondo a prononçia do XVIII sec. e e reggole do Prien do 1745; ecetto "ë" = æ, "ö" = œu);
lasciao a tirde in sciâ "n", in corscivo i atre ligatue, in apiçe e coreçioin posterioî; tra e parentexi quaddre e lettie da azonze, tra e tonde quelle da esponze;
[ 98r ]
Chì se contèm lo sermon e la lezenda de messê sam Lorensso martiro.

"Disperxit dedit pauperibus iusticia eius manet in secullum seculli." Queste parolle che e' ve o prepoze sum scripte in um libero de lo testamento vego, lo quâ fè Daniel proffeta, e apellase "Lo sarmista", lo quâ uza la santa maire Zexia contuniamenti, e le quë parolle noi possemo apropiâ a messê san Lorensso, lo quâ ave a despenssâ lo tezoro de la sata[sic] Zexia, là unde noi possamo dî de lê, messê san Lorensso si disparsse e dè a poveri tuto lo so tezoro e la iustixia si romaze conseigo in seculla secullorum. E si vosse fâ messê san Lorensso, secondamenti che Ihu. Xe. comanda in lo santo Evangellio, soè: "Rendi quelle cosse chi sum de Deo a Deo."

E cossì fè messê san Lorensso, che ello reize le soe cosse in trei modi.

Lo primo modo si è che ello dè tuto lo tezoro a poveri, lo quâ ge avea lassao messê san Cistro papa quando ello era in prexom, che li poveri vegnivam a lê, e pöa che questo tezoro ge fo demandao da lo inperao, si demandà termen in de lo quâ de termen si dè tuto so che g'era romazo de lo so e de la Ihexa a poveri, li quai poveri o li menà tuti davanti a lo inperao, e disse che li poveri era lo tezoro de Dee, lo quâ non vem mai men. E però ello dixea a lo inperao: "Li tezori de la Zexia, li quâ ti me demandi, le main de li poveri li am portë in cel."

La seconda cossa che ello fè si fo che si fo che ello dè lo corpo a martirio e a [ 98v ]tromento, secondamenti se leze in la soa lezenda, che ello resevè peña e tromento contra la umanitae e contra iustixia, inperochè ello fo rostito[sic] in sum le grè. E tanto era lo hamare[sic] e la fe' e la grande speranssa e lo premio che ello aspeitava, che tuto questo tromento portava in paxe e quelli carboni[sic] afogai ge pareivam grande refigerio, secondo che se dixe in la soa lezenda, che ello con la soa mesma bocha dixea, a quelli mizeri chi lo tromentavam, e' dixea: "O mizeri e ho[sic] che voi avei rostio l'una parte de lo mê corpo pigai l'atro lao e mangallo." E pöa disse a Vallariam inperao: "O mizero, e' vögo che ti sapei[sic] che questi töi carboim me sum grande refigerio, ma ti starai in tromenti prepetui." Odî e vei se messê san Lorensso era bem frevente e forte constante in lo amô de lo so maistro Ihu. Xe., unde ello dixea stagando a lo fögo: "Messê, e' te rendo gracia che ti me lassi intrâ dentro le toe porte de vita eterna."

Anchora devei savei che messê san Lorensso fo preveligao de trei previlegi infra li atri martori.

E lo primo si fo che ello ave da la santa maire Zexia, che ella la soa festa abia vigillia comandata che non è nissum atro martiro chi abia zozu[sic] de la zexia.

Lo secondo si fo [che] ello fo lo urtimo arcidiacono chi fosse in de la zexia, si como messê san Stevam fo lo primo.

Lo terso previllegio si è che ello fo (che ello fo) misso in um morimento con messê san Stevam.

Lo quarto previlegio si è che la soa passiom è staita proâ per li moi dotoi de la Zexia santa, soè Gregorio, Augustino, Anbroxio, Ieronimo, la quâ passiom se cointa in questo modo:

Noi lezamo de messê san Lorensso che ello si fo martiro e diachono de Evangerio, e fo nato de Spagna e menao a Roma per messê san Cistro in questo modo. Che seando santo Cistro andaito in Spagna, si aquistà lì doi zoveni, soè messê san Lorenso e messê san Visenso so cugnao, conposti de onesti e de belli costumi e in ogni atra vertue, e per carissimi conseigo a Roma li menà. Apöi messê san Stevam romaze a Roma con san Cistro e san Visenso tornò in Spagna e lì finì so gloriozo martirio. Alaora san Cistro si ordenò san Lorensso so ardiacono. E in quello tenpo segnorezava Fillipo inperao in Roma, e um so figo avea, chi Fillipo era ihamao. E questi eram faiti fidelli crestiani e senper eram daiti a edefficar zexie pu ca nissuna atra cossa. E si era cum questo inperao um cavaller, lo quâ era monto pordomo e vallente de soa persona, lo quâ avea nome Dicio e era monto discreto e famozo de monte vallentie che in so tenpo aveiva faite. E in quello tenpo vègne növa a lo inperao che la provincia de Itallia se g'era revellâ. Alaora lo inperao ge mandà questo so carissimo Dicio, e inperochè se la provincia de Itallia fosse rebella tuto lo romam inperio serea sogigao. E andaito che fo questo Dicio in quelle parte, si ave gandementi vitoria. E tornando a Roma e lo inperao odando como Dicio tornava con grande vitoria, vogandoge fâ grande honô, si andò incontra con soa gente da Roma fin a Verona. Unde vegando Dicio che lo inperao ge avea faito grande honô, incontenente se movè a superbia e ave marvaxi penseri in lo so core[sic] si como de amasare lo so segnô. E seano[sic] um dì lo inperao inter lo so pavigone e dormiendo, e Dicio si intrò don dentro e si l'amassà. Unde la gente chi eram vegnui con lo inperao se dem grande maravega como si subitamenti ello fosse morto, e intendando questo so figo como so paire era morto, si ave grande poira e alaora si arecomndà tuto lo tezoro de so paire e lo so a messê san Sistro, lo quâ era papa de Roma e a me mesê sam Lorenso chi era so ardiacono, che in caxo che ello fosse preizo o morto per questo Dicio, lo quâ avea morto so paire, che ello devesse dâ questo tezoro a la Zexia e a li poveri de Dee. E pöi che questo Filipo ave daito lo so tezoro, como e' amo dicto, si se partì da la fassa de questo Dicio. E quando questo Dicio tornò a Roma si ge fon tuta la gente incontra per la grande vitoria che ello ave avoto, e alaora lo senato de Roma con lo popullo si lo fem inperao. E quando o fo cumfermao, si devegne monto crudê contra li crestiani, e incomenssà monto a preseguitalli sensa nissuna mizericordia, e a marturialli. E infra questa cotal presecuciom monte migëre de martori fè amassâ, infra li quai fo questo Fillipo, zovem figo de lo inperao, che ello amassà a traimento. E pöa che ello ave faito tanto malle a tanti crestiani amassâ, si incomenssà a demandâ lo tezoro de lo so segnô lo inperadore, e arecordandosse de messê san Cistro como ello adorà messê Ihu. Xe. e como lo inperao era morto crestiano, e' si disse in so cör: "Questo si averà tuto lo tezoro de [ 99r ]lo mê segnore." E alaora si fè prende messê sa[sic] Cistro e fello mete in prexom, e comandà che ello ge devesse stare fin a tanto che ello avesse negao Xe. e lo tezoro che ge fo arecomandao avesse reizo.

Alaora messê san Lorensso si lo incomenssà a seguî e a ihamallo digando: "Como vai-tu senssa lo to figollo, lo quâ ti ai ordenao in lo santo ordem sagrao? E non savei-vo voi che 'o eri uzao de non andâ senssa mi e avereive faito cossa chi ve fosse despiaxua?" De che messê san Lorensso se dava grande tribullaciom, persochè messê san Cistro era stëto misso in prexom senssa ello. E lantô messê san Sistro respoze e disse: "Figo, e' non t'o miga abandonao, ma a ti è reservao moi tromenti cha a mi per la fe' de messê Ihu. Xe.. Mi como vego porterò lengê tromento, ma ti como zovem averai e porterai tromenti asai, e pu e diverse cosse saram faite inver de ti che non saram inver de mi, e infra trei iorni ti me seguirai." E lantora ello ge consignà tuto lo tezoro che ello avea e dissege che ello lo devesse tuto despensâ a li poveri. E deprezente messê san Lorensso zè e dè tuto questo tezoro a li poveri crestiani e non callà mai fin che ello non l'ave tuto despensao.

Or messê san Lorensso ze a caza de una bona dona crestiiana chi avea aschozo monti crestiani per la poira che aveam de questo Dicio inperao. E questa dona avea portao per um gran tenpo una grade[sic] döga de testa, e messê san Lorensso ge misse la man sum la testa e ella fo deprezente saña e libera, e a tuti li crestiani chi eram in quello lögo lavà li pê e pöa ge dè la limoxina. Or quando messê san Sistro non vosse consentî a sacrifichâ e[sic] le idolle, Dicio lo fè tromentâ. E seando in li tromenti messê san Lorensso ge dixea: "Paire non me abandonâ che tuto lo tezoro che ti me ai daito e' l'o bem despensao."

E lantor li cavarê de Dicio, intendando como lo tezoro che elli andavam serchando era speizo per questo, si lo preizem e menanllo denanti a Partemio tribuno, e questo lo aprezentà a Dicio. E quando Dicio lo vi si ge disse: "Unde è lo tezoro che noi samo chi è stao misso apè to?" E messê san Lorensso non ge fè nissuna responsiom. E lantô e' lo dem a um cavarê chi avea nome Villario preffeto, asochè ello ge devesse fâ sacrifichâ a le idolle e manifestâ lo tezoro, e se ello non fava questo che o lo feisse tromentâ de diversse penne. E questo Vilario lo dè in goardia a um so servente de la prexom, lo quâ avea nome Ipolito. E seando messê san Lorensso in prexom, lo nostro Segnor Dee mostrà per ello monti mirachulli. Inter li atri ello inluminà um sego, lo quâ avea nome Lucido e lo quâ era staito um gram tenpo in prexom, e monti atri infermi odando so si andavam a ello, e tuti o li sanava.

E stagando cossì in prexom, questo Ipolito ge demandà che era de lo tezoro de lo so segnô, e messê san Lorensso respoze: "O Ipolito, se ti voressi cre in lo mê Segnô messê Ihu. Xe., per lo quâ tu vei quante cosse e' fasso per la soa possansa, e' te mostrerò lo tezoro, e pöa te prometo che averai vita eterna."

E Ipollito respoze: "Se li töi dee fossem cossì virtuoxi, e' farea so che tu me di."

E lantora ello se convertì e resevè lo santo batesmo con tuta la soa masnâ, e incontenente Ipollito vi le anime de li iusti e monti angeri alegrasse. Si che tuti noi possamo vei como le anime de li iusti quando le persone de questo mondo tornam a penetencia. E de so dixe lo Avangerio: "Grande alegressa a li angeri de Dee quando um pechao torna a penetencia."

E in quello dì Vallarano mandà a dî a Ipollito che ello ge devesse aprezentâ messê san Lorensso. E Ipollito ave grande poira, e messê san Lorensso lo confortà prometandoge vita eterna. E quando elli fon davanti a Valariano, e ello ge incomenssà a demandâ lo tezoro, e messê san Lorensso demandà termen trei di per aprezentallo. E lo dicto Valariano lo arecomandà (a) anchora a Ipollito, non sapiando anchora che ello fosse faito crestiiano. E in questi trei iorni che messê san Lorensso ave termen, ello ze e recogè tuti li infermi e poveri che ello trovà, e a lo terso iorno o li aprezentà tuti a Dicio e ge disse: "Vete lo tezoro de la sana[sic] Zexia, lo quâ m'è stao arecomandao e lo quâ in questi mai non mancherà e senpermai o se troverà in le lor main e si lo an portao in cel."

E Dicio odando queste parolle fo monto turbao e fè monto tromentâ messê san Lorensso de deverssi tromenti. E messê san Lorensso ne churava pocho, avanti o ne refferiva gracia e lozo a lo nostro Segnor [ 99v ]Dee. E stagando messê san Lorensso in li tromenti, um cavaler de Dicio chi avea nome Romano se convertì a messê Ihu. Xe. e disse a messê san Lorensso: "O Lorensso, e' vego um bellissimo zovem chi te sta davanti chi te forbe tute le toe piage con um lensör monto biancho, per che e' te prego che ti non me abandoni, ma arditamenti me debi batezâ."

E lantor Dicio disse a Valariano: "E' temo che noi non siamo[sic] vensuo da questo per arte magicha." E comandà che sam Lorensso fosse desligao e che ello fosse misso in la prexom de Ipolito como ello era da pruma. E lantora Roman portà um vasello de aigoa a messê san Lorensso e se fè batezâ.

Or quando Dicio sape so, si fè monto duramenti bate Roman, ma vegando che non persochè questo Roman non sesava de conffessâ lo nome de Ihu. Xe., si lo fè degollar. E in quella mesma nöcte sam Lorenso fo menao davanti a Dicio, e disege che ello devesse orâ le idolle, e se o non lo fava che ello lo farea duramenti tromentâ. E messê san Lorensso respoze: "La mea nöcte non a schuritae, ma tuta è de luxe resprendente." E Dicio vegando la constancia de questo, comandà che fosse faito um leto de ferro como una greixella, e comandà che cossì afogâ che messê san Lorensso ge fosse tuto nudo[sic] desteizo suza, e che otra questo o ge fosse faito um grande fögo de sota.

Or quando questo santo corpo fo sum lo fögo, ello disse a Valarano: "O mizero sapi che questi töi carbim[sic] sum a mi de gram refigerio, ma a ti e' te saram peña eterna." E pöa o dixea per voreillo fâ convertî: "E questo si è persochè per nissuna cossa e' non o renegao lo mê Creatô."

E seando rostio o referiva senper gracia a Dee. E pöa con grande alegressa o disse a Dicio: "O mizero, pöa che tu ai faito rostî una parte de lo mê corpo, fa voze l'atra parte e mangane de so che g'è cöto." E senper o referiva gracia a lo nostro Segnor messê Ihu. Xe. e dixea: "Segnô mê Ihu. Xe. e' ve refero gracia chi avei vosuo arvime le porte de lo pareizo, asochè ge vegna dentro." E a questa parolla la anima se partì da lo corpo e ze in vita eterna a lozo de lozo de lo Figör de Dee chi è beneito in seculla secullorum.

Amen.