Ms. Marston 56/De la lezenda de messê santo Zerbonio vescho e conffesao

From Wikisource
Jump to navigation Jump to search
Manoscrito Marston 56, 1465
De la lezenda de messê santo Zerbonio vescho e conffesao
azonto maiuscole, pontezatua, trattin inte forme interrogative e diacrittichi (segondo a prononçia do XVIII sec.; "ë" = æ, "ö" = œu);
lasciao a tirde in sciâ "n", in corscivo i atre ligatue, in apiçe e coreçioin posterioî; tra e parentexi quaddre e lettie da azonze, tra e tonde quelle da esponze
[ 156v ]
Chì se contèm la lezenda de santo Zerbonio vescho e confessao de messê Ihu. Xe.

In lo tenpo che in le contrae de Africha era faito grande persecuciom contra a li crestiani per la fe' catolicha, lo biao Regullo era arcivescho de quello paize, e seando ello pin de Sprito Santo, contuniamenti o dixeiva a lo popullo che se partissem da la erexia de li Guandali e messê Ihu. Xe. Figio de Dee adorassem con tuta la soa vertue.

Or in quello tenpo lo paire de lo biao Zerbonio ze in quelle parte, e vegando la grande santitae e miracori e dotrina de lo biao Regullo, e como o l'ameistrava contuniamenti lo pövo, disse: "O biao Regullo, e' te vögio arecomandâ mê figio Zerbonio, e si te prego che ti me lo ameistri in la fe' catolicha, e si me lo ameistra in la santa scriptura."

E lo biao Regullo pigià lo fanti' Zerbonio e ameistravallo in la santa fe' crestiana, e fo faito so disiporo. Ma lo biao Regullo vegando la grande erexia chi multipichava forte, ello abandonà la cedia che ello rezea e missese a partî, ello e Zerbonio so desiporo, per mar, e con monti atri o passà a Roma. E seando a Roma e partiandosse lo biao Regullo con tuti li conpagi[sic], si se misse a fâ vita ermita. E fassando santa vita o mostrà lo Segnor Dee monti miracolli per ello. E per la fe' ello ave tagiâ la testa da re Tutilla, lo quâ contrava a la santa fe'.

Or lo bio[sic] Zerbonio sapiando questo, se ne ze a la citae e de Populonia, in la quâ citë ge era una zexia de la biâ Vergem Maria, e erage um santo vescho lo qua avea nome

[ 157r ]Lorentino, e lo quâ fo monto consorao de la vegnua de Zerbonino[sic]. E stavam inseme con grande amó de caritae serviando a messê Ihu. Xe. in grande caritae, e tuto lo pövo era monto consolao de la vegnua de Zerbonino per la soa bona e santa vita, e per ello apareiva monte sante cosse.

Or o cheite che lo biao Florentino passà de questa vita, e lo biao Zerbonio vi portâ da li angeri la soa anima in cel. Or seando congregâ tuta la terra con lo pövo e la iherexia, si dixeam a Zerbonio: "Tu sarai nostro pastô, persochè finarmenti lo nostro Segnor Dee t'a mandao cocì, asochè tu debi reze questo nostro pövo."

E lo biao Zerbonio intandando[sic] so, si incomessà[sic] a dî che ello non era degno de tanta dignitae.

Ma tuto lo pövo e tuta la iherexia dixeam: "Noi te cognossemo pu per nostro paire e nostro pastô pin de gracia e de vertue."

Ma lo biao Zerbonio se schuzava senper digando: "E' cognosso che non son degno de tanta dignitae."

E la iherexia con tuto lo pövo a una voxe incomenssàm a dî: "Se ti non vöi avei noi mizeri a la toa goardia, lo nostro Segnor Dee te demanderà raxom de le nostre anime."

Or lo biao Zerbonio intendando so, si concentì e preize lo veschao, e per monto tenpo o governà quello pövo in vita soa in grande paxe, e ave tanta gracia da Dee che ello con le soa oregie odiva li canti che fava li angeri de vita eterna. E questi canti o li odiva senper la domenega sum l'arba de lo iorno, e per amô de so a quella ora o dixea una messa a reverencia de la biâ Vergem madona santa Maria e pöa o fava la caritae con li atri monexi in reverencia de la Vergem Maria. Or lo pövo chi era in quelle parte non poiva vegnî a la zexia cossì per tenpo, e a grande hora lo pövo vegniva a la zexia per odî la messa e per prende la benissiom da lo vescho, e questo non poiva esse persochè lo biao Zerbonio con li atri iherexi aveiva preizo cibo. E lo pövo vegando questo per monte fië se indegnàm monto e dixeam: "Che è so che fa lo nostro pastô, che canta la messa in l'ora de l'aurora e pöa che o mangie con li söi iherexi?"

E seando de questo grande mormoraciom inter lo pövo, si lo acuzàm a lo papa Vigellio, chi in quello tenpo rezea la santa Zexia romana. Or lo sabo a vespo lo papa apostolicho vegne a la zexia de messê san Thomao, como era uzanssa e in quello lögo, monti parochiain de quelli de lo biao Zerbonio se lamentàm e dissem: "Paire noi te demandemo mizericordia, persochè lo vescho che noi amo non oserva la fe' crestiana secondo lo so officio, consoseacossachè la domenega o dixe senper la messa a la aorora, soè a l'arba, e pöa con li söi sacerdoti como caritae prende cibo. Levao lo sol noi andemo a la zexia per odî la messa." E intendando so lo papa si fo pin de ira contra lo biao Zerbonio e vescho de Panpolonia, e fè doi anbasatori e ge disse: "Andaivene a lo vescho de Panpolonia, soè Zerbonio, e comandaige da parte de lo biao Pero apostoro principo de li apostori, che deprezente o vege[sic] a noi per vei se l'è veritae de quello che li söi parochiain dixem. E se fosse veritae o sarea grande erexia questa che o mete inter lo puövo[sic]."

E li legati zem e fem tuto so che lo papa g'ave comandao. E lo biao Zerbonio recevè questi legati con grande amore[sic] e disse: "Segnoi, noi se aparegemo anchöi e demand anderemo davanti lo papa como voi avei comandao."

E lo dì de la domenega che ello devea andâ, se levà a mezanöte e refferì gracia a Dee e quando vègne inver lo jorno, ello disse a lo diacono: "Va a vei se e' l'è anchora ora de dî la messa secondo la nostra uzassa[sic]." E lo diacono insì föra de la zexia e goardà e tornà dentro e disse: "E' l'è ora de dî la messa secondo la vostra uzanssa."

E lo biao Zerbonio se aparegià de dî la messa a lo otâ de la Vergem Maria, como ello era uzao, e dicta la messa o fè caritae con li söi iherexi, como e' l'era uzao. E lantô lo bio[sic] Zerbonio disse a li anbasatori: "Fraelli, per amô de Dee e de la Vergem Maria prendei lo refficio con noi e como noi facemo."

E elli respozem: "Noi non semo heretici, ni transpasatoi de lo comandamento de Dee e de la santa Zexia como voi sei, chi dî per tenpo la messa e pöa per caritae mangë e bevei con li vostri sacerdoti."

Or elli se missem per camin per tornâ a Roma, e seando prevegnui a um fiume ihamao Sallivolba e questi legai per afano de la via e' incomenssàm de avei grande sea, e si dissem: "Mostraine de la aigoa unde e' possamo beive."

E lo biao Zerbonio disse: "Fraelli mê, noi non s'amo atra aigoa salvo questa de questo fiume, la quâ è fortementi sarâ."

E seando andai per spacio de mezo migiâ, elli fon agrevai de si grande see[1] che elli non se poivam pu sostegnî in pee e dixeam a lo biao Zerbonio: "Paire santo aitöriane, che noi moriamo."

E lo biao Zerbonio disse: "Perchè non me vorei-vo voi cre quando e ve pregai che per lo amor de Dee e de la Vergem Maria, che voi feissi caritae con noi, e voi non voreissi. E' non posso fâ atro salvo pergâ Dee per voi."

E orando per lor, ello vi passâ doe cerve, a le quë lo biao Zerbonio disse: "E' ve comando in lo nome de lo mê Segnor messê Ihu. Xe. che voi non ve movei fin che e' sarao[sic] a voi."

E elle se astallàm deprezente. E ello preize um bossê che elli aveivam, e si ze a le serve e si le alaità e inpì quello bossê de laite, e adusselli a questi. E bevando questi lo laite e' fon deprezente refforsai. E pöa e' dem licencia a le cerve che caminem.

Or lo biao Zerbonio caminando con li legati, ge disse um so diachono: "Paire tu vai a lo papa e si non ai nissum dom per parte de li töi parochiain che ti ge possi aprezentâ, e inpersò e' o grande poira che o non se möve a ira contra de ti."

E lo biao Zerbonio disse: "Non abi paura[2], che o speranssa in lo mê Segnor, che avanti che sea là o me darà so che e' ge dom aprezentâ."

Or andando o goardà e vi trei homi vegij chi ge vegnem incontra, li quai eram monto infermi. E demandandoge mizericordia e lo biao Zerbonio li segnà de lo segno de la santa croxe, e deprezente e' fom faiti sain de le lor infirmitae. Or vegando so li legati avem grande temanssa e dixeam: "Se questo vescho non fosse elleto da (da) Dee, ello non poreiva fâ queste cosse."

Or ello prevègne a una valle chi è apresso a um monte chi se piama monte Gaudio, e li legati dissem che elli voreivam avanti andâ a nonciâ la soa vegnua a lo papa. E partiandosse elli arivàm a um prao chi se piama lo prao de Nerom, e se ne zem a lo papa e si ge dissem tuto quello che lo biao Zerbonio avea faito per la via. E lo papa odando so fo monto maravegiao e fè deprezente aparegiâ de l'aigoa beneita e de lo incenso a modo de una prosesiom con letanie e salmi, e vègnem incontra a lo bio[sic] Zerbonio.

Or andando lo biao Zerbonio per lo prao de Nerom, ello vi una grande quantitae de oche salvaige chi voravam per le aire, contra le quae ello fè lo segno de la santa croxe: "Non abiai licencia da lo mê segnor messê Ihu. Xe. de partive, ni de vorâ in nissuna parte, fin a tanto che voi no me avei aconpagnao davanti a lo papa."

E le oche vegnem deprezente in terra a ello, e ello ge andava avanti parandolle da la gente. E cossì e' l'aconpagnàm fin a la gordia[sic] de messê san Pero, unde lo papa lo aspeitava. E quando o fo davanti a lo papa o disse: "Ve-te, paire, questo mê picem dom che te adugemo da la nostra zexia."

E lo papa ge refferì gracia. [ 157v ]E pöa lo biao Zerbonio se vozè inver lo oche e fège lo segno de la santa croxe e disse: "E' ve libero in lo nome de lo mê segnô messê Ihu. Xe. chi voi volei unde ve piaxe."

E deprezente elle se ne voràm in aire e se ne zem via. E lo papa Vigellio vegando so se maravegà monto e pregà lo biao Zerbonio che ello voresse intrâ con ello in zexia de messê san Pero apostoro. E seandoge ello intrao, elli se missem a lo sepolcro de messê san Pero, e fè soa oraciom. E faita la oraciom ello disse a lo papa quâ era la caxom per che o lo avea faito demandâ. E lo papa respoze e disse: "Li parochiem de la toa zexia se sum lamentë, e dixem che ti di la messa la domenega a la matim per tenpo, e pöa fai caritae de pam e de vin con li töi sacerdoti, e pöa levao lo sol elli venem a la zexia e si non pom avei messa. De che me sum monto maravegiao e si vögio savei perchè ti fai questo, consoseacossachè questa uzanssa non se fa in tuta la santa Zexia."

E lo biao Zerbonio ge respoze e disse: "Paire santo, e' non è inposiber a Dee mostrâ li söi miracori a chi ge piaxe, e inpersò, anchöi è sabo, e' te prego che questa nöte noi pregemo e che non seamo negrigenti in pregâ lo Segnor, che fossa che per ventura, avanti che me parte de chì, o ve mostrerà perchè e' fasso questo."

Or in qualla[sic] nöte o non se partì da l'oraciom fin a l'ora de matin, e pöa lo bia[sic] Zerbonio disse: "Paire, digemo li matin." E dicto lo officio lo biao Zermonio disse a lo so diacono: "Va e goarda se l'è anchora ora de dî la messa segondo la nostra uzanssa." E lo diachono ze e retornà e diesse[sic] a lo biao Zerbonio: "Paire e' l'è uzanssa ora de dî la messa segondo la vostra uzanssa."

E alaora lo biao Zerbonio ihamà lo papa e preize la soa man drita e sum lo so drito pee e como in segno de la croxe e pöa o ge disse: "Goarda inver lo cell." E lo papa goardà e vi li angeri chi cantavam la messa e odì ihairamenti dî: "Gloria in ecest ecelcis Deo."

E lantor lo papa disse a lo bio[sic] Zerbonino: "E' cognosso fermamenti che la gracia de lo Sprito Santo è in ti persochè messê Ihu. Xe. t'a revellao de le soe cosse secrete, e mi semegeivementi e' vögio tegnî questo modo, e depoî noi monti atri lo terràm."

E pöa lo bio[sic] Zerbonio se partì da lo papa e se tornà a Panpolonia. E da quello dì apresso che lo biao Zerbonio vegniva a lo papa, lo papa se levava da la cedia e si ge andava incontra.

Or lo biao Zermonio tègne quella uzanssa in soa vita, e cossì a faito li somi pontiffici fin a lo dì de anchöi, e per nissum ree, ni principo, ni vescho non se leva lo apostolicho de soa cedia, salvo per lo vescho de Populonia.

E questo Zerbonio fo homo de grande santitae e de santa vita, e pin de grande siencia e de grande vertue, e monto graciozo inter li religioxi e inter li mondaim. Ma in quello tenpo li Longibardi preizem tuta Toschana, e lo bio Zerbonio fuzì in l'izora de l'Erba, e si ge stè fin a lo dì de la soa morte. Ma avanti che o se partisse de la soa zexia de Populonia, o se fè fâ lo so sepolcro, in lo quâ in la soa fin vosse esse sepellio. E quando o vègne a la soa morte, o comandà a li söi iheregi che quando o fosse morto, che e' lo devessem portâ a Populonia e metello in lo so seporcho. A lo quar li söi iheregi respozem: "Paire, como te ge demo noi portâ? Non sai-to che li Longibardi am preizo tute quelle contrae?"

E ello disse: "Portaimege seguramenti e sepelimege, e si ve ne tornerei seguramenti."

Or morto questo santo, e' missem lo so corpo in una nave e incomenssàm de andâ inver Panpulonia. E subitamenti o se misse una grande aigoa da cel intorno a la nave, ma per vertue de lo santo corpo inter la nave non pioveiva niente, e navegàm fin a Panpulonia. E incontenente e' deseizem de la nave e portànllo a la sepotura con grande reverencia, e si lo sepelim. E pöa deprezente e' se partìm, e apena che fom in nave recogeiti, che quello marvaxe ducha de Longibardi si vègne in lo lögo unde era sepellio quello beneito corpo con grande gente, e apar che tuto questo fosse steito[sic] revellao a lo biao Zerbonio a so che ello disse: "Deprezente che voi me averei sepellio, si ve partî."

E tuto questo è faito a lozo e a gloria de lo Figör de Dee, lo quâ vive e regna in ceculla cecullorum.

Amen.

  1. questa grafia a poriæ indicâ che a dexinensa -ea, comme in sea, mea, avea etc., into 1465 a l'ea za prononçiâ . G. Musso
  2. poiira cangiao in paiira