Miyri qanǵansha (Qayıpnazarov)
Suńqar alıp ushtı sharqı pálekke,
Bizler sapar shektik Baltik tárepke,
Házir seziledi óz úyimizdey,
Burın darımasaq ta bul dógerekke.
Al, Biybijan keldik Baltik eline,
Dáslep qutlı qádem qoydıq jerine,
Júr, qánekey, sayran etip shıǵayıq,
Qaraǵaylı jasıl qırat beline.
Kelip edik háwes bolıp sonshama,
Elin, jerin aralayıq, sharshama,
Kóp qaraysań, yamasa dep tursań ba,
Gózzallıqtı qaydan alǵan bunshama?!
Mańlay terden gúl jaynaǵan kelbeti,
Jerdi sulıwlaǵan xalıqtıń miyneti,
Jer jánnetin qoldan jasap qoyǵanı,
Bizdey miyman ushın etken húrmeti.
Jerlerine qara gil kók giyalı,
Baǵlarına qara salqın sayalı,
Qıyabanlap ekken gúller ishinde,
Úmme-dúmme eser shayır qıyalı.
Yurmala jer eken húrlerge tolı,
Kózdiń jawın alar gúllerge tolı,
Endi iske salıp ilhám perisin,
Kewlim qarar tappas jazbasam bunı.
Meniń ózim gózzallıqqa bendemen,
Tábiyattı pardozlayman kúnde men,
Tań nurınday sulıwlıqtı kóremen,
Ottay ısıq hár bir taza gúlde men!
Sen de gúlseń ómirimdi bezegen,
Jańılısıp qátelessem dúzegen,
Gúldey jumsaq mineziń bar jaydarı,
Mehir tolı kewilińdi sezemen.
Jipek shashlarıńdı jelpisin samal,
Ashılsın zeyiniń, ashılsın jamal,
Ayaǵıń awırsa, áziyzim azlap,
Teńiz jaǵasında otırıp dem al.
Qarayıq teńizge kózler talǵansha,
Tolqınlardıń sırın uǵıp alǵansha,
Biziń de kewlimiz usı teńizdey,
Tolqıp tasa bersin miyri qanǵansha.
Dulubtı, 1976-jıl