Miynet et (Qayıpnazarov)
Kemtarlıq joq, Watanımda,
Xalıq abadan, el azat,
Oqıwǵa hám islewge,
Íqtıyarlı adamzat.
Jahanǵa táriyipi túsken,
Kúshleri bar káramat.
Meniń gúlistan elimde,
Dáwran súrgen azamat.
Ádiwli ana-Watanǵa,
Shın kewilden xızmet et.
Xalıq ushın tuwılǵan erseń,
El qádirin bilseń er.
Shadlıq mákanıńda júrseń,
Zawkı-sapa súrseń er.
Nur zamanda óskenime,
Írazıman derseń er.
Janımnan áziz anam dep,
Húr Watandı súyseń er.
Qúdiretli kúshlerińdi,
Kórset xalıqqa xızmet et.
Súy Watandı, súy elińdi,
Sıyla xalıqtı kúsh berer.
Xalıq xızmetin bejergendey,
Azamatqa is berer.
Ullı isti qolǵa alsań,
Jumsa kúshti, sal jiger.
Miynettiń palwanı bolsań,
Iste tanılsań eger.
Erlik dańqıńa ılayıq,
Is islewdi ádet et.
Shóllerde baǵlar dóretip,
Sayran etip júrmege,
Dushpannıń ishin kúydirip,
Shadlı ómir súrmege,
Jerlerdiń bawrın iydirip,
Mol zúráát úymege,
Iseseń mańlay terletip,
Hám ráhát kórmege,
Tileseń kurǵın jasawdı,
Isle talap miynet et.