Mi p’tit bouname

From Wikisource
Jump to navigation Jump to search
Joyeux rèspleus  (1899)  by Jean Bury
Mi p’tit Bouname
[ 31 ]
MI P’TIT BOUNAME !

Air : Je suis caline

1

J’a s’posé li p’tit Gilles Moflasse,
Li pus nozé qu’seuye kinohou ;
Vormint comme si l’bon Diu l’volasse
Onk po l’aute nos éstans crèhou.
Il a fleur di bon caractére,
I grouinzèye, i rèye todis,
Nos polans bin dîre qui so l’térre
Essonle nos avans l’paradis.

Respleu

Mi p’tit bouname
Por lu m’cour blamme !
I n’ârè mâye nolu
Qui m’plairè st-ottant qu’lu.
Mi p’tit bouname,
Por lu m’cour blamme !
Mi nozé,
Binamé,
Oh ! comme il est ainmé !

2

Dismèttant qui j’l’a po k’pagnèye
J’a l’dada di tos mes sohais,
Ca ji v’pous dîre qui j’sos sognèye
Fi parêye qui les p’tits ouhais.
I n’mi mâque nin minme ine attèche,
Et s’il arrivéve qui j’geairreus
Pawou di m’vèyî mette ine têche,
J’âreus foû d’lu çou qu’ji vôreus.

[ 32 ]

3

I r’trouve tote li manôye di s’pèce
Ca, grâce à mi, n’li mâque di rin.
Si m’vèye n’est rin d’aute qu’ine carrèsse
Dè mèyeu di m’cour ji li rind.
Comme deux colons d’vins n’colèbîre,
On n’qwire mâye à qwitter l’happâ
Sins qu’on seuye èssonle, et j’pous dîre
Qu’onk sins l’aute on n’est bin nôle pâ.

4

I n’a portant n’saquoè qu’nos mâque,
Ji broûle des chandèlles à hopai
Po qui l’grand saint faisse si mirâque
Et qu’nos avôye on p’tit cârpai.
Nos n’avans nin co d’ses novelles
Mâgré qu’nos geairanse foèrt après,
Min ji broul’rè tant des chandèlles
Qui l’binamé saint m’l’accoèdrè.