Meniń baǵım (Qayıpnazarov)
Gúller menen kúter, hurmetler kelseń,
Miynetten dóregen jánnet pe deyseń,
Aralasań ilham berer, yosh berer,
Miywanıń bári bar baǵıma kirseń.
Meniń baǵım, ósken jerim, keń dalam,
Qan taratqan júregime teń dalam,
Eńbek etsem saqıy tógip taslaydı,
Miynet miywasına tolı aynalam.
Kızıqsań, júrekte yoshıń bolsa kel,
Kel dostım, bilekte kúshiń bolsa kel,
Jalqaw bolsań baǵım qabıl etpeydi,
Xadal miynet, súygen isiń bolsa kel.
Islewge kewilli, júriwge jaylı,
Gúlleri shıraylı, miywası saylı,
Qansha eńbek etseń sonsha alarsań,
Jumsaǵan kúshińe, isińe paylı.
Jetilgen, tolısqan házirgi waǵım,
Alǵa jeteleydi bir kúshli aǵım,
Jambaslap jatırǵan qumlardı túrip,
Sheldi shegindirgen bul meniń baǵım.