Mehir bulaǵım (Qayıpnazarov)
Men bir shopan edim qoy baǵıp júrgen,
Shıjǵırǵan ıssıda tabanı kúygen,
Ash bolǵan shıǵar dep izimnen sonda,
Jarma alıp kelgen ananı súygen.
Qoylar otlar edi dúzdi toltırıp,
Men baǵıp júrer em júzdi soldırıp.
Jalǵız júrip dalada qoy baǵıwdan,
Qutılar em qara gúzdi boldırıp.
Qısqı boran boslaw kórip iyimdi,
Ísqırǵan ayazda qıssam iyindi,
Anam meni tońbasın dep suwıqqa,
Jamap berer edi jırtıq kiyimdi.
Meniń anam Gúljámiyla gúl edi,
Mehnr nurın tógetuǵın kún edi.
«Meniń de bir ulı-qızım erjetse —
Qolım uzayar» — dep kútip júr edi.
Aytqanı bolmadı, ol ketti taslap,
Bizler jetim qaldıq kózlerdi jaslap,
Basımızǵa tústi awır mashqala,
Qıyınlıqqa kóndik sol kúnnen baslap.
Anam sáni edi úydiń ishiniń,
Múltigi joq edi etken isiniń,
Sol mehriban ǵamqorımnan ayrılıp,
Qoy-janlıǵın baǵıp óstim kisiniń.
Jaz bolsa qattı nan tınısh jelinbey,
Qıs bolsa mektepke qatnap erinbey.
Tiyip-qashıp oqıw oqıp awılda,
Sawat ashıp xat tanıdım ebindey.
Esim endi, erkin bastım ayaqtı,
Júrip kórdim, bildim oyaq-buyaqtı,
Shopanlıqtı qoya berip qolıma,
Qálem aldım, taslap qayqı tayaqtı.
Aydalada jas toltırıp kózime,
Táǵdir burın qoy baqtırsa ózime,
Eń izinde shayır bolıp jetildim,
Bul kúnleri jurt uyıydı sózime.
Házir men qayrılıp qarasam izge,
Kóz jiberip tursam balalıq gezge,
Úmme-dúmme esip jaslıq qıyalım,
Oylarım ılaǵıp ketedi dúzge.
Baradı bayaǵı jazıq dalaǵa,
Tanıs sahra-shólge, sayǵa-salaǵa,
Otlaqlı óriste qoy baǵıp júrgen,
Qáne gezleser me shopan balaǵa?!
Izine erer me qozı ılaǵım,
Sózine túrer me dala qulaǵın,
Talay jarma tasıp, aq soqpaq etken,
Dúzine kelerme mehiri bulaǵım?!