Me n'è staa ofert, a st'ora, vintiquatter
Me n'è staa offert, a st'ora, vintiquatter,
o trenta; robba, proppi, de no cred!...
Ma, mi, in sti offert, quand che no soo el caratter
della personna, hoo poca bonna fed!
N'hoo vist de sett o vott,... ma sèmm al Pater!
Cont pussee se ghe guarda, e manch se ved!
A induvinalla ben, no ghè descor,
l'è on miracol dezis che fa el Signor!
La prudenza, va ben, l'è bella e bonna...
M'è pars d'èss staa prudent anca alla prima...
Ma chi l'è mai che pò cognoss la donna
se, dal pù al men, ghe n'han tutt ona rima?
Olter che la prudenza!... El me cojonna!
Pussee prudent d'on omenon de zima
come Socrate?!... Eppur, in simil cas,
la dis la Storia in dove l'ha daa el nas!
No serv avèggh talent nè vèss gasgiott,
l'è on gran colp de fortunna, l'è ona sort,
che stimi pù d'ona quintina al lott,
combinass duu pensà che va d'accort!
Tutt el rest mi nol cunti on bel nagott!
Quand ghè la pas in cà, sèmm a bon port!...
Se esist felicitaa, l'è questa chì!...
Ma in dov'hin sti mosch bianch ai noster dì?...
Mi, che soo come stoo cont quell lassù,
come mai poss pretend sta distinzion?
N'hoo ben vist di tosann, che, intuitù,
de moral n'hoo bonissima opinion!...
Esuss per lee, anch Cecchina, per virtù,
per governà la cà, per religion,
l'era on tesor!... Eppur cossa hoo passaa?
Dio l'abbia in gloria... Vundes ann dannaa!
Devi vèss compatii se voo pian pian,
se ghoo pagura a fa sto pass anmò...
Car sur dottor, parli col cœur in man,
me pias i sœu tosann, gh'el neghi no...
ma, ch'el me creda de bon cristian,
che tremi semper d'on quaj qui pro quò!...
Se podess praticaj de confident...
Benchè hin precauzion che var nient!
Che serv infin?!... Per vegnì fœura nett,
bœugna fa cunt d'andà fraa de la Trappa!
Lo spiega Metastasi cont quell dett:
«Nella guerra d'amor vince chi... scappa!
Per conseguenza, quell che vœur in lett
quaj boccon de podè fa ciappa-cappa,
l'ha de vèss preparaa anca a soffrì
tutt i malann che ghe pò intervegnì!