Maqsuda (Qayıpnazarov)
Watan isinde júrseń,
Márt sózliseń Maqsuda.
Shámen ishinde gúlseń,
Gúl júzliseń Maqsuda.
Kúlgenińde kózińnen,
Nur tógiler Maqsuda.
Sóylegende sózińnen,
Dúr tógiler Maqsuda.
Duyım jurttıń ishinde,
Júziń ısıq Maqsuda.
Máńgi qalar esimde,
Sóziń qızıq Maqsuda.
Bizdi tanıs etipti,
Doslıq sezim Maqsuda.
Kelipti de ketipti,
Jaslıq gezim Maqsuda.
Jiberemen kewildi,
Óz erkine Maqsuda.
Bas iyemen ádiwli,
Gúl kórkińe Maqsuda.