Ma se ghe penso

From Wikisource
Jump to navigation Jump to search
Ma se ghe penso
by Mario Cappello
da "Zena a canta", 1926 - www.zeneize.net
I

O l'ea partïo senza 'na palanca,
l'ea zâ trent'anni, forse anche ciù...
O l'àia lottòu pe mette i dinæ ä banca
e poèisene un giorno vegnî in zù.
E fâse a palassinn-a e o giardinetto,
cö ranpicante, co-a cantinn-a e o vin,
a branda attacco ai èrboi, all'uso letto,
pe daghe 'na schenâ seia e mattin...
Ma o figgio o ghe dixeiva: No ghe pensâ
a Zena, cose ti ghe veû tornâ!

Refrain:

Ma se ghe penso
alloa mi veddo o mâ
veddo i mâe monti, a ciassa da Nonsiâ...
Riveddo o Righi e me s'astrenze o cheu,
Veddo a Lanterna, a Cava, lazzù o Mêu...
Riveddo ä seia Zena illuminâ,
veddo là a Foxe e sento franze o mâ
e alloa mi penso ancon de ritornâ
a pösâ e osse dôve ho mâe madonnâ...

II

E l'ea passou do tenpo, forse troppo,
o figgio o l'inscisteiva: Stemmo ben,
dove ti veû andâ, papà?.. pensiemo doppo,
O viägio, o mâ, t'ë vegio, no conven!
Oh no, oh no! me sento ancon in gamba,
Son stuffo e no ne posso proprio ciù,
Son stanco de sentî: Señor, caramba
Mi veûggio ritornamene ancon in zù...
Ti t'ê nasciuo e t'ae parlòu spagnollo,
Mi son nasciuo zeneize e... no me mollo.

Refrain:

Ma se ghe penso, ecc. ecc.

Per finire

E sensa tante côse o l'é partïo
e a Zena o gh'à formòu torna o so nïo.