Máńgi jasar sózleri (Qayıpnazarov)
Túyiser jol dárbenti,
Sheshiler sózdiń bánti,
Tawlı elde júripti,
Qaraqalpaq perzenti.
Ózinshe oy súredi,
Sózge qulaq túredi,
Lermontov bolǵan jerdiń,
Hár giyasın súyedi.
Tawǵa miner órmelep,
Júrer qolın sermelep,
Sol kúnlerden sır shertip,
Samal eser erkelep.
Júregi talwas eter,
Qıyalı tolqıp keter,
Kóre qalǵan shayırdı,
Tawdan bir saza keler.
Sóyler haqgóy jaslıǵın,
Teńsizlikke qaslıǵın,
Haq qanına jerigen,
Sumnıń bawırı taslıǵın.
Jańǵırǵan sol gezleri,
Óshpes atı izleri,
Júreklerden jay alǵan,
Máńgi jasar sózleri.