Lo guaracino (raccolta Agrumi)

From Wikisource
Jump to navigation Jump to search
Agrumi  (1838)  by August Kopisch
Lo guaracino
Lo guaracino

Lo guaracino

[ nap ]

Canzone sulla Tarantella.

(Napoli.)

Lo guaracino, che jeva pe mare,
Le venne la voglia de se 'nzorare:
Se facette no bello vestito
De scarde, de spine pulito, pulito
Co na parucca tutta ingrafata,
De Ziarelle imbrasciolata,
Co lo sciabò scolla e puzini
De punte angrese fini, fini!

Co li cauzuni de rezze de funno
Scarpe e cauzette de pelle de tunno
E sciammeria e sciammerino
D'aleche e pile de voje marino,
Co bottune e bottunera
D'uocchie de purpe, secce e fera,
Fibie, Spata e fiocche annorate
De nigro de secce e fele d'acchiate.

[ nap ]

Doje belle cateniglie
De premmone de cochiglie,
No capiello agallonato
De codarino d'alluzzo salato,
Tutto posema e stentariello
Jeva facendo lo sbafantiello
e girava da cà e da là
La n'ammorata pe se trovà!

La sardella a lo barcone
Steva sonanno a lo calascione
E a suono de trommetta
Jeva cantanno st'arietta:
E tarè io mmoro e lena
e la figlia da sia Lena
Ha lasciato lo n'ammorato,
Pecchè niente l'ha rialata!

Lo Guarracino 'nche la guardaje,
De la Sardella se'nammoraje;
Se ne jette da na vavosa,
La chiù vecchia maliziosa!
L'ebbe bona rialata
Pe' mannarle la masciata:
La vavosa pisse pisse
Chiatto, e tunno'nce lo disse.

[ nap ]

La sardella 'nche sentette
Rossa rossa se facette:
Pe o scuorno che se pigliaje,
Sotto a no scuoglio se 'mpizzaje;
Ma la vecchia de vava Alosa
Subeto disse: ah schefenzosa!
De sa manèra no truove partito,
Te resta 'ncanna lo marito!

Se aje voglia de t'allocare,
Tante smorfie non aje da fare!
Fora se zeze, e fora lo scuorno!
Anema e cora e faccia de cuorno! —
Ciò sentenno, la sia Sardella
S'affacciaje a la fenestrella,
Fece n'uocchio a zennariello
A lo speruto 'nammoratiello.

Ma la patella, che steva de posta,
La chiammaje faccia tosta,
Tradetora, sbriognata,
Senza parola, malenata:
Ch'aveva chianto lo Latterato;
Primmo, e antico 'nammorato,
De carrera da chillo jette
E ogne cosa 'nce decette. —

[ nap ]

Quanno lo 'ntise lo poveriello,
Se lo pigliaje Farfariello!
Jette a la casa e s'armaje a rasulo,
Se carrecaje comm'a mulo,
De scopette e de spingarde,
Povere, palle, stoppe e scarde
Quatto pistole e tre bajonette
Dint a la sacca se mettette.

Sopra li spalle sittanta pistune,
Ottanta bomme, e novanta cannune
E comm'a guappo Pallarino
Jeva trovanno lo Guarracino:
La disgrazia a chisto portaje
Che miezo a la chiazza te lo 'ncontraje
Te l'afferra po crovattino
E po le dice: Ah mallandrino!

Tu me lieve la 'nammorata
E pigliatella sta mazziata;
Tuffete, e taffete a meliune
Ledevapaccare e seccuzune,
Schiaffe puna e perepesse
Scoppolune, fecozze e conesse,
Scerevecchiune e sichetenosse
E l'ammarca ossa e pilosse.

[ nap ]

Venimmongenne, ch'a lo remmore
Pariente e amice ascettero fore,
Chi cò mazze, cortiello e cortelle
Chi co spate, spatune e spatelle
Chisto co barre e chillo co spite
Chi co ammenole e chi co antrite,
Chi co tenaglie e chi co martielle,
Chi co terrone e sosamielle.

Patre, figlie, marite e mogliere
S'azzuffajene come a fere:
A meliune correvano a strisce
De sto partite e de chillo li pisce.
Che bediste de sarde e d'alose.
De palaje e raje petrose
Sareche, dientece ed acchiate,
Sciurme, tunne e latterate,

Pisce palumme e pescatrice
Scuorfene, cernie ed alice
Muchie, ricciole, musdee e mazzune
Stelle, aluzze e storiune,
Merluzze, ruongole e murene,
Capodoglie, orche e vallene
Capitune, auglie e arenghe,
Ciefore, cuocce, traccene e tenghe

[ nap ]

Treglie, tremmole trotte e tunne,
Fiche, cipolle, laune e retunne,
Purpe, secce e calamare,
Pisce spate e stelle de mare,
Pisce palumme e pisce prattielle,
Voccadoro e cecenielle,
Capochiuove e guarracine,
Cannolicchie, ostreche e ancine,

Vongole, cacciole e patelle,
Pisce cane e grancitelle,
Marvizze, marmure e vavose,
Vope prene, vidove e spose,
Spinole, spuonole, sierpe e sarpe,
Scauze, nzuoccole e colle scarpe,
Sconciglie, gammeri e ragoste
Vennero nfine colle poste,

Capitune, saure e anguille,
Pisce gruosse e peccerille,
D'ogne ceto e nazione
Tantille, tante, chiù tante e tantone.
Quanta botte, Mamma mia!
Che se devano, arrasso sia!
A centenara le barrate,
A meliune le petrate,

[ nap ]

Muorse e pizzeche a beliune,
A delluvio i secozzune!
No ve dico, che bivo fuoco
Se faceva per ogne luoco
Tè, tè, tè, cà pestulate
Tà, tà, tà là scopettate
Tù, tù, tù, cà li pistune
Bù, bù, bù, là li cannune.

Ma de cantà so stracquato,
E me manca mo lo sciato,
Sicche dateme licienza,
Grazeosa e bella audienza,
'Nfi che surchio na meza de seje,
Co salute de luje e leje;
Ca se secca lo cannarone,
Sbacantannose lo premmone!





Lo Guarracino

Raccolta Agrumi.