Les tchafiaedjes da Ptit Louwis/56

From Wikisource
Jump to navigation Jump to search
Ôtès modêyes : Feller-Goffart
Les tchafiaedjes da Ptit Louwis  (2020) 
Jean Goffart
55

Sins pont d’ djins !

El dierin côp ki dj’ a metou on biyet, dji n’ aveu waire a dire puski tos les spôrts estént a djoke !

C’ est l’ vraiy ki l’ cronivirûsse nos a espaitchî di shure les ekipes ou les djins k’ ont l’ abitude di nos fé djiper dins no fåstroû. Sacwants moes å long, tot a stî candjî totafwaitmint.

Do costé des deus spôrts les pus veyous dins les medias, çoula s’ a fwait d’ ene façon bén diferinne.

Ciclisse

Les rafiyants d' velo polnut ecoradjî leus favoris dissu les tchmwins di France, d’ Itåleye ou di Pologne. Li toû del Pologne a stî repoirté pa no grand espwer bedje, Remco Evenepoel. E-n Itåleye, a Milan-San Remo, c’ est èn ôte djonne di no payis k’ a ramassé l’ prumire plaece : Wout van Aert. L' ome a-st eto wangnî ene etape do Dåfiné eyet l’ tchampionat d’ Beldjike do conte-el-monte.

Les grandès coûsses, ermetowes dins l’ calindrî, s’ ont shû raddimint. Nén todi åjhey a comprinde çou k' c' est, dedja k’ on creteriom (li Dåfiné) deure cénk djoûs eyet k’ on toû (del Lombardeye) finit e-n on djoû. Mins rén èn candjive avou ls ôtes anêyes, sinon les wangnants eyet les cis ki tchaiynut. Dins les tcheyeus, gn a pa egzimpe Evenepoel, k’ a passé ådzeu d’ on ptit meur po s’ ertrover ût metes pus bas avou ene fraiteure do bassén.

Tant k’ å tchampionat do monde, les Swisses ont candjî d’ idêye et rfuzer d’ l’ organijhî. Les decideus cachnut on tradjet po l’ replaecî (putete e l’ Toscane).

Ronde bale

Po l’ fotbale, les copes d’ Urope s’ ont achevé e 16 djoûs. Les ekipes djouwént dins on minme payis mins les djins èn si plént rinde å ståde po-z ecoraedjî leu-n ekipe. Des pårteyes sins ambiance; c’ est moirt eyet ça n’ vike nén. Mins bon, c’ est mî k’ rén di waitî çoula dins l’ boesse ås imådjes avou, metans, on 8 a 2 po l’ Bayern conte el Bårça.

C’ est dayeurs el minme afwaire avou l’ tchampionat d’ Beldjike. Il a comincî el 8 d’ awousse sins nolu dins les gradins. Po l’ pitite istwere, les prumî et troejhinme di l’ anêye passêye s’ ertrovît e-n adroveure. Et c’ est Tchålerwè k’ a stî batou 0 a 1 a Brudje.

El pire, c’ est k’ on a waire d’ idêye disca cwand çoula va continuwer sins rwaitants. Disk’ å moumint ki l’ virûsse serè-st evoye ?

I fåt sawè eto ki les djouweus sont controlés å moens deus côps pa samwinne. Å moumint wou dji scrî, on cache a-z awè des derogåcions po rimpli les stådes avou 5000 djins, avou condicions.


Ôtes espôrts

Tant k’ ås ôtes espôrts, i gn a ki rpudnut sins nolu eyet ds ôtes ki doeynut ratinde. C’ est l’ minme po les etrinnmints.

E tenis, el tournwè di Cincinati eyet l’ US-Open ès front a Noû York, sins djins ; seulmint les djouweus eyet des ancyins wangnants.

E formule onk, les otos toûnnut mierseules dissu les circûts, ki ça fouxhe a Francortchamp ou bén ôte pårt.

Les spectateurs sofrixhnut di l’ afwaire, mins come dins tot, i fåt ratinde. Ratinde des meyeusès condicions et k’ el cron virûsse s’ evåye ou bén k’ on euxhe on vaccin. Avou l’ espwer ki ça n’ trinne nén dtrop pask’ i gn a pont d’ rintrêye di liårds eyet i fåt tolminme payî (cråsmint) les djouweus et les moenneus.

Mins çoula, c’ est ene ôte pwaire di mantche (di mayot bén etindou) !


Jean Goffart, el 23 d' awousse 2020