55. Le ingresso in le Celo

.1 Quando illes arrivava al Porta, super illo stava scribite iste parolas, con characteres de auro: Beate es illes qui observa Su commandamentos a fin que illes obtene le derecto de prender del Arbore del Vita, e pote entrar per le Portas intra le Citate! [Apoc 22:4].

.2 Alora io videva in mi sonio que le homines lucente les exhortava a clamar al Porta, e illes lo faceva. Alcunes reguardava de super le Porta. Illes esseva Enoch, Moses, Elia, etc. al quales on diceva: "Iste pelegrinos ha venite del Citate de Destruction pro le amor que illes ha pro le Rege de iste Placia. Alora le pelegrinos dava a illes cata uno su proprie certification que ille habeva recipite in le comenciamento. Istos esseva pois portate al Rege, le qual diceva: "Ubi sta le homines?. On Le respondeva: "Illos sta foras del Porta. Alora le Rege les commandava de aperir le Porta: "A que le nation juste, Ille diceva, "le qual observa le veritate, velle entrar! [Is 26:2].

.3 Ora io videva in mi sonio, que iste duo homines entrava per le Porta, e ecce, in entrar, illes esseva transfigurate, e on les revestiva de vestimentos lucente como de auro. Il habeva anque illes qui les veniva pro incontrar con harpas e coronas, e illes los dava a illes, le harpa pro sonar le laudes, e le coronas como signo de honor.

.4 Alora io audiva in mi sonio, que tote le campanas del Citate comenciava a sonar de gaudio, e que on diceva a illes: "Entra nunc in le gaudio de vostre Senior. Io anque audiva celle ipse homines qui cantava a voce alte e diceva: "Benediction, honor, gloria, e poter, sia a Ille qui sede super le Throno, e al Agno pro semper.

.5 Ora, justo quando le portas esseva aperite pro permitter le ingresso de iste homines, io reguardava post illes, e ecce, le Citate brillava como le sol, anque le stratas esseva pavite per auro, e per illos camminava multe homines con coronas super lor capites, palmas in lor manos, e harpas auree pro cantar laudes.

.6 Il habeva anque alcunes con alas, e illes respondeva sin cessar le uno al altere: Sancte, sancte, sancte es le Senior! E post isto, illes claudeva de novo le Portas, e quando io reguardava tote isto io multo haberea desirate star ibi con illes.

.7 Ora, durante que io reguardava tote iste cosas, io volveva mi capite pro reguardar retro, e io videva Ignorantia, le qual habeva arrivate al bordo del Fluvio. Ille tamen tosto lo preteriva, sin non mesmo le medietate del difficultates que le altere duo habeva.

.8 De facto, ille habeva incontrate un transportator, un certe Vansperantia, le qual con su barca le adjutava a transir le Fluvio. Assi ille, como io videva, successava arrivar al Porta, tamen sol, e nemo veniva verso ille pro incoragiar le al minus un poco.

.9 Al porta, ille reguardava al scripto que stava super le Porta, e pois ille comenciava colpar, e ille supponeva que tosto alcuno haberea venite pro servir a ille. Ma le homines que stava super le Porta le demandava: "De ubi veni tu, e que vole tu?. Ille respondeva: "Io ha mangiate e bibite al presentia del Rege, e Ille ha inseniate per nostre stratas.

.10 Pois illes le demandava si illes poteva vider su certification, a fin que illes lo poterea monstrar al Rege. Assi ille explorava tastante e sin successo in su sino, e ille non lo poteva trovar. Alora illes diceva: "Tu non ha alcun certification?. Le homine tamen non respondeva un sol parola. Illes refereva isto al Rege, ma Ille refusava de descender e vider celle homine. Ille commandava, tamen, al duo Lucentes que habeva conducite Christiano e Sperante al Citate, de exir e de prender Ignorantia, de ligar le manos e pedes e de mandar le via.

.11 Assi illes le prendeva e le transportava per le aere retro de novo al Porta que io habeva vidite al latere del prime colle, e illes le deponeva ibi. Pois io videva que in le Citate de Destruction il habeva anque un via que conduceva al Inferno, tanto como il habeva uno que conduceva al Portas del Celo. Assi io me eveliava, e ecce, il habeva essite un sonio.